Lionsklúbburinn Fjörgyn í Grafarvogi hélt sína árlegu Stórtónleika í Grafarvogskirkju fimmtudaginn 9. nóvember síðastliðinn, til styrktar BUGL og líknarsjóði Fjörgynjar. Tónleikarnir í ár voru þeir fimmtándu.

Margir af þekktustu listamönnum þjóðarinnar komu fram og gáfu allir vinnu sína. Þeir voru Ari Eldjárn, Dísella Lárusdóttir og Gissur Páll Gissurarson, Greta Salóme, Geir Ólafs, Guðrún Árný Karlsdóttir, Helgi Björnsson, Raggi Bjarna, Sigríður Thorlacius og Sigurður Guðmundsson, Guðrún Gunnarsdóttir og Sigga Beinteins og Vox Populi kór ungs fólks og stjórnandi hans Hilmar Örn Agnarsson. Undirleikarar voru Jónas Þórir, Matthías Stefánsson og Þorgeir Ástvaldson.  Kynnir kvöldsins var Gísli Einarsson.

Ágóðinn af styrktartónleikunum í þessi fimmtán ár hefur meðal annars runnið til Barna- og unglingageðdeildar Landspítalans, BUGL.  Árið 2011 afhenti klúbburinn BUGL  tvær bifreiðar til eignar ásamt rekstrarkostnaði.  Fyrir tveimur árum voru bifreiðarnar síðan endurnýjaðar og rekstarkostnaðurinn fylgdi með.  Þær eru margoft búnar að sanna gildi sitt og eru mikilvægur hlekkur í meðferðarstarfi BUGL, sérstaklega vegna aukinnar áherslu á  vettvangsþjónustu og samvinnu við aðila í nærumhverfi.

Legudeild BUGL hefur til umráða aðra bifreiðina sem er níu manna og er notuð til ýmissa vettvangsferða með börnin og unglingana. Legudeildin hefur jafnframt á þessu ári aukið vettvangsþjónustu sína og vinnur mun meira í nærumhverfi barnanna en áður.  Göngudeild BUGL hefur haft  hina bifreiðina til afnota fyrir vettvangsþjónustu en þá fara meðferðaraðilar í nærumhverfi barns, á heimili, stundum í skóla og  sinna ráðgjöf og meðferð.  Auk þess hefur klúbburinn gefið BUGL ýmsan tæknibúnað og tæki til að styðja við starfsemi þeirra.

Þessir tónleikar eru orðnir fastur liður hjá mörgum tónleikagestum og flytjendum. Ávallt hefur myndast góð og afslöppuð stemning þar sem gestir hlusta á frábæra listamenn og um leið styrkja þeir mjög þarft málefni.  Eftirfarandi var haft eftir einum tónleikagesti: „Atriðin voru afbragðsgóð og vel valin. Það var hins vegar andinn í salnum sem rak smiðshöggið á stórkostlegt kvöld. Það var svo létt og notaleg og persónuleg stemning – sem ég tel að þið skapið með góðum undirbúningi, skipulagi og nærveru. Það var sú tilfinning sem gerði kvöldið einstaklega eftirminnilegt. Þetta vorum við hjónin algjörlega sammála um.“

Félagar í Lionsklúbbnum Fjörgyn þakka öllum þeim sem lögðu þeim lið í þessu verkefni fyrir stuðninginn, þar á meðal listamenn, styrktaraðilar og tónleikagestir.

geMynd: Sigrún Björk Einarsdóttir (studiomynd.is)