„Við áttum að gera heilsueflandi verkefni eða koma umræðu á framfæri á einhverjum samfélagsmiðli, einum eða fleiri. Ég ákvað að búa til hóp á Facebook, þar sem meðlimir eru hvattir til hreyfingar og umfram allt að finna hreyfingu sem hentar þeim og er skemmtileg,“ segir Jonna. Hópurinn heitir því skemmtilega, langa og réttnefnda nafni: Hreyfing er hundlétt og heillandi, ef hún er skemmtileg!
„Þetta er lýðheilsuverkefni sem felst í því að fá fólk til að auka hreyfingu. Öll hreyfing telur en markmiðið er að hreyfa sig eitthvað flesta daga. Ég hvet alla til að taka þátt á sínum forsendum og deila sem víðast og fá sem flesta með okkur.“
Hún gerði meira en að stofna hópinn, því hún tekur líka þátt sjálf. „Ég tek þátt í verkefninu sjálf og nýti mér hvatninguna sem ég fæ úr hópnum, auk þess að hvetja aðra með minni þátttöku.“
„Ég gleymdi hreyfingunni að mestu á meðan ég var að klára MA verkefnið mitt með miður góðum afleiðingum. Regluleg hreyfing dregur mun meira úr stoðkerfisverkjum mínum en nokkur verkjalyf og er tvímælalaust betri kostur. Hreyfing er nauðsynleg fyrir alla, en kyrrsetan er að drepa okkur mörg. Ég stefni því að fara um það bil þrisvar í ræktina í viku og fara svo í göngutúra og hjólatúra eftir aðstæðum hina dagana.“
Hreyfing er mikilvæg fyrir heilsuna
Heilsa er líkamleg, andleg og félagsleg vellíðan. Of mikil kyrrseta er heilsuspillandi, margir vilja auka hreyfinguna en koma sér ekki í gírinn, mikla það fyrir sér en hreyfingu er hægt að gera skemmtilega og auðvelda með því að bæta hana í smáum skrefum. Það að ganga einn hring í hverfinu er betra en engin hreyfing. Það er gott að stunda fjölbreytta hreyfingu.
„Við vitum það að það er ekki alltaf auðvelt að breyta venju og við vitum líka að prédikun og fortölur og fögur fyrirheit virka ekki heldur. Ég eins og svo margir sofna á verðinum þegar mikið er að gera og oft dettur hreyfingin út. Ég hef setið mikið við ritgerðarskrif og fleira og finn hvað það var ekki góð hugmynd að sleppa hreyfingunni. Afleiðingarnar voru mikil þyngdaraukning og meiri verkir. Besta leiðin min er að fara 3-4 sinnum í viku í tækjasal og æfa í um það til 30 – 40 mínútur. Við það vil ég bæta við göngutúrum, frá 10 – 20 mínútum eða lengur eða hjólatúrum. Um að gera að velja þá hreyfingu sem þér þykir skemmtilegust og aðgengilegust,“ segir Jonna.
Allir velkomnir með, hvar sem þeir búa
Hópurinn stækkar stöðugt og þegar þetta er skrifað telur hann 611 meðlimi og fjölda mynda og færslna. „Ég hef fengið alls konar myndir og umsagnir um hreyfingu, flestar frá Íslandi, en líka erlendis frá eins og til dæmis frá Filippseyjum.
Þrátt fyrir að Jonna hafi skilað inn verkefninu ætlar hún að halda hópnum lifandi áfram. „Þetta er semsagt alvöru lýðheilsuinngrip í mínum huga og mun hvetja mig og aðra til að auka hreyfingu.“
Allir eru velkomnir í hópinn sem finna má hér.
