„Celeb,“ svarar Höskuldur Birkir Erlingsson formaður Karlakórs Bólstaðarhlíðarhrepps og skellihlær þegar Bleikt.is hafði samband við hann í dag og spurði hvernig honum liði með sigurinn.
„Við erum í skýjunum. Þegar við ákváðum að taka þátt þá vorum í basli með að dekka þetta, við höfðum hreinlega ekki mannskap, enda margir kórfélagar bændur, sem voru að smala og í réttum og svo framvegis. Við náðum 20 manna kór, sem var ansi brothætt, af því að þá mátti enginn fá kvef eða meira,“ segir Höskuldur.
Kórar Íslands er búinn að vera á dagskrá Stöðvar 2 í vetur og kynnir þáttanna er Friðrik Dór Jónsson, einn ástsælasti söngvari landsins, Dómnefndina skipa tónlistarfólkið Kristjana Stefánsdóttir, Ari Bragi Kárason, og Bryndís Jakobsdóttir.
Tuttugu kórar tóku þátt. Fyrstu fimm þættirnir voru einskonar undankeppni og komust tíu kórar áfram í undanúrslitin. Síðan voru tveir þættir til að skera hópinn niður í fjóra kóra sem kepptu til úrslita í gærkvöldi. Tólf aðilar, í það minnsta, urðu að vera í hverjum kór fyrir sig.
„Við áttum að vera í fyrsta þættinum, en svo breyttist það sem betur fer og við vorum settir í þriðja þáttinn og þá komu inn menn sem hefðu ekki haft tök á að mæta í þann fyrsta,“ segir Höskuldur.
„Við renndum bara blint út í þetta, við vissum ekkert hvað við vorum að fara í, en okkur fannst þetta skemmtilegt, ögrandi og dálítið mikið út fyrir þægindarammann.“
„Þetta gekk bara vel og við komumst áfram í undanúrslitin og tókum ákveðna áhættu þar með því að flytja frumsamið lag. Textinn er eftir einn kórfélagann og lagið er eftir Skarphéðinn kórstjóra,“ segir Höskuldur. „En það hitti alveg í mark, lagið er létt og skemmtilegt og það er gaman að horfa á fólk þegar við erum að flytja lagið, maður sér að það fer að dilla sér í sætunum þá veit maður að fólki líkar lagið. Við vorum með þetta lag fyrir þó nokkuð mörgum árum síðan, en það er ekkert þekkt og hefur ekki farið víða. Það lukkaðist vel.“
„Síðan voru úrslitin í gær og ég vaknaði í morgun: „Var mig að dreyma eða ?,“ segir Höskuldur sem horfði á þáttinn í heild sinni í morgun.
Kórinn er 90 ára gamall og í honum eru 28-35 karlar, en þeir voru 44 núna. „Við höfum aldrei verið svona margir áður,“ segir Höskuldur sem sjálfur er búinn að vera 13-14 ár í kórnum. Hann er þó alls ekki með lengstan feril þar, en í kórnum eru félagar sem hafa verið í kórnum í 40-50 ár.
Kórinn hittist tvisvar í viku og æfir. „Á mánudögum á Blönduósi í kirkjunni og erum þá með undirleik og á fimmtudögum í Húnaveri og þar tökum við oft raddæfingar. Skarphéðinn Einarsson kórstjóri er búinn að stjórna kórnum í eitt ár.“
„Við erum búnir að vera með skemmtilegt prógram síðustu 3-4 ár og höfum verið með hljómsveit með okkur. Við tókum fyrir fjórum árum lög Geirmundar Valtýssonar og fórum með víða um land. Það var mjög vinsælt og vel sótt og við gáfum út geisladisk með þeim lögum, hann seldist í um það til 2500 eintökum. Í framhaldi af því tókum við lög Vilhjálms og Ellýjar og það var líka rosalega gaman,“ segir Höskuldur.
Höskuldur Birkir er lögregluvarðstjóri í lögreglunni á Blönduósi. En hvernig skyldi ganga að samræma kórstarfið aðalstarfinu?
„Bara ágætlega, auðvitað getur maður lent í að vera í útköllum eða verkefnum þegar er kóræfing og þá er ekkert við því að gera. En þetta gengur ágætlega,“ segir Höskuldur.
„Já mjög svo, hvort sem þú ert karl eða kona,“ svarar Höskuldur aðspurður um hvort að fólk ætti að drífa sig í kór. „Ef þú hefur gaman af tónlist og að syngja þá endilega drífðu þig. Þú ert líka hluti af heild, þetta er bara félagsstarf eins og annað félagsstarf en það er bara gaman að taka þátt í svona.“
Vinningurinn var gjafabréf frá Icelandair að fjárhæð 4 milljónir króna og kemur það sér vel fyrir Ítalíuferð kórsins næsta sumar.
„Við vorum búnir að skipuleggja ferð til Ítalíu næsta sumar, þannig að væntanlega munum við nýta gjafabréfið upp í þá ferð. Þetta verður skemmtiferð um Norður Ítalíu og væntanlega munum við kíkja á einhverja tónleika,“ segir lögregluvarðstjórinn syngjandi hress og kampakátur með sigurinn fyrir sína hönd og kórfélaga sinna.
