Raunveruleikastjarnan hefur talað opinberlega um að hún glími við psoriasis, en hún talaði fyrst um það í viðtali árið 2010.
Síðan hefur hún talað reglulega um hvaða aðferðum hún hefur beitt við að halda sjúkdómnum og einkennum hans niðri. Móðir hennar, Kris Jenner, er líka með sjúkdóminn. „Ég hef reynt hefðbundnar meðferðir, en ég er alltaf tilbúin til að reyna nýjar aðferðir,“ segir Kim. „Einu sinni drakk ég meira að segja brjóstamjólk Kourtney!“
Kim sagði einnig frá að hún væri að mestu hætt að reyna að fela einkennin fyrir öðrum. „Ég hugsa bara að þetta sé minn galli og allir viti af honum, þannig að af hverju að hylja þau?“
Psoriasis er langvinnur, síendurtekinn húðsjúkdómur. Sjúkdómsferlið getur verið mjög mismunandi, allt frá vægum einkennum, þar sem sjúklingurinn gerir sér jafnvel ekki grein fyrir að um psoriasis sé að ræða, til tilfella sem geta haft félagslega örorku í för með sér og jafnvel verið beinlínis lífshættuleg.
Psoriasis er ekki smitandi en getur hins vegar verið ættgengt. að baki er mjög flókið erfðafræðilegt mynstur, sem menn hafa enn ekki áttað sig á, en þetta tengist einnig því að sjúkdómurinn virðist vera algengari hjá einstaklingum í ákveðnum vefjaflokkum.
Psoriasis getur herjað á alla aldurshópa, en er algengastur hjá einstaklingum á aldrinum 15-40 ára. Orðið psoriasis er dregið af gríska orðinu psora, sem þýðir kláði.
Heimild: Doktor.is
