„Ég heyrði læti við dyrnar, eins og fótatak, svo ég kallaði „Hver er þar?„, segir Kim um það fyrsta sem hún man varðandi ránið í París. Þetta kemur fram í lögregluviðtali hennar sem var lekið í fjölmiðla og birt hjá franska dagblaðinu Le Journal du Dimanche.

„Enginn svaraði svo ég hringdi í lífvörðinn minn, klukkan 2:56 um nóttina. Í gegnum hurðargatið sá ég tvær manneskjur koma, ásamt næturverðinum sem var bundinn,“

segir Kim.  Skýrslan var tekin af Kim um klukkan 04:30 um nóttina. Kim segist hafa verið ein þegar mennirnir ruddust inn í íbúðina, en eins og áður hefur komið fram notuðu þeir lykla næturvarðar hótelsins.  Kourtney systir hennar og Stephanie Sheppard aðstoðarkona Kim voru á skemmtistað í borginni á þessum tímapunkti, ásamt Pascal Duvier lífverði Kim.

Kim var á efri hæð hótelíbúðarinnar að vinna í tölvunni sinni. Mennirnir tveir voru vopnaðir og annar þeirra var með skíðagleraugu.

„Það var þessi með skíðagleraugun sem beið hjá mér. Hann krafðist þess að fá hringinn minn með sterkum frönskum hreim. Hringurinn var á náttborðinu. Hann er 4 milljón dollara virði [um það bil 450 milljónir íslenskra króna] … ég sagði honum að ég vissi ekki um hann, hann tók þá upp byssu og ég sýndi honum hringinn,“ sagði Kim í yfirheyrslu sinni hjá lögreglunni í París.

„Þeir gripu mig og tóku mig fram á ganginn, ég var í náttslopp en nakin undir honum. Svo fórum við inn í herbergið aftur og þeir ýttu mér á rúmið. Það var á þessum tímapunkti sem þeir bundu mig með plastsnúrum og límdu utan um hendurnar mínar, yfir munninn á mér og fæturna.“

Þeir rændu skartgripum að andvirði meira en hálfum milljarði og flúðu svo af vettvangi. Eins og við sögðum frá í síðustu viku handtók lögreglan í Frakklandi 17 einstaklinga í tengslum við ránið, þar á meðal bílstjóra Kim. Ekki hafa fengið upplýsingar um það hvað kom fram í þeim yfirheyrslum.