Í nýlegu viðtali sagði leikkonan Natalie Portman frá því að hún hafi fengið þrefalt lægri laun en mótleikari hennar Ashton Kutcher í kvikmyndinni No Strings Attached. Um er að ræða rómantíska gamanmynd sem kom í kvikmyndahús árið 2011.
Ashton Kutcher deildi viðtalinu við Natalie á Twitter þar sem hann hrósaði henni fyrir að stíga fram. „Svo stoltur af Natalie og öllum konum sem standa upp gegn launamun kynjanna,“ skrifaði Ashton.
So proud of Natalie and all women who stand up for closing the gender pay gap! https://t.co/AV1uYY6KIe
— ashton kutcher (@aplusk) January 11, 2017
Í viðtalinu sagði Natalie að það væri erfitt að kvarta sökum þess hversu mikið leikarar fá borgað fyrir hverja mynd. Staðreyndin sé þó sú að launamunurinn í Hollywood sé meiri en í öðrum starfsgreinum. Natalie segir konur almennt þéna að meðaltali 80 sent fyrir hvern dollara sem karlmaður þénar. Í Hollywood þéni þær um það bil 30 sent af hverjum dollara. Bilið verður síðan breiðara þegar um minnihlutahópa er að ræða.
„Það er augljóst vandamál að konur skortir tækifæri,“ segir Natalie. „Við þurfum að vera hluti af lausninni í stað þess að viðhalda vandanum.“
