Forsala Bleiku slaufunnar hófst í dag og ef hún er keypt í forsölu verður hún send í umslagi með Póstinum til kaupanda 28. september þannig að hún ætti að berast til kaupanda 29.-30. september. Verð slaufunnar er 2.175 kr. með sendingarkostnaði.
Ása Gunnlaugsdóttir hönnuður og gullsmiður hannaði slaufuna en hún bar sigur úr býtum í samkeppni um hönnun Bleiku slaufunnar 2017. Skartgripir hennar eru seldir í skartgripaverslunum víða um Ísland og eru þekktir fyrir stílhreina og vandaða hönnun.
Ása hefur víðtæka reynslu í hönnun og smíði skartgripa og hefur starfað sem hönnuður á Íslandi, Finnlandi og í S-Kóreu. Ása lauk MA-prófi í iðnhönnun við University of Art and Design (UIAH) í Helsinki og BA-prófi í gull- og silfursmíðum frá Lahti Design Institute í Finnlandi. Í Finnlandi starfaði hún með námi sem gullsmiður hjá stærsta skartgripafyrirtæki Finnlands, Kalevala Jewelry. Eftir nám kenndi hún skartgripahönnun við UIAH. Síðar rak hún vinnustofu í Helsinki.
