Nú eru 8 mánuðir liðnir frá því að skilnaður Brangelinu skók heimsbyggðina. Margir hafa eflaust beðið í ofvæni eftir að Brad Pitt tjáði sig um skilnaðinn og tilfinningar sínar í kjölfarið, og það hefur hann nú gert í forsíðuviðtali við GQ Style. Þar talar Brad á opinskáan hátt um bresti sína sem áttu þátt í aðdraganda skilnaðarins, og hvernig hann hefur notað tímann síðan til að bæta sig og verða betur fallinn til þess að ala upp börnin sín sex.
„Ég er nýbyrjaður í þerapíu,“ segir Brad í viðtalinu, en allir fjölskyldumeðlimirnir hafa fengið faglega hjálp eftir skilnaðinn. Brad segist hæstánægður með byrjunina.
Í september á síðasta ári var fjölskyldan um borð í einkaflugvél á leið til L.A. þegar tilkynning barst um átök milli Brad og 15 ára sonar hans, Maddox Jolie-Pitt. Nafnlaust símtal þess efnis barst lögreglu, og leiddi það til rannsóknar FBI á ásökunum um ofbeldi (málinu lauk síðan án þess að kæra væri gefin út). Fimm dögum eftir atvikið í flugvélinni sótti Angelina um skilnað.
Brad segir skilnaðarferlið hafa verið erfitt fyrir þau öll, sérstaklega börnin.
Sem betur fer ganga samskipti fyrrum hjónanna betur núna en þau gerðu síðastliðið haust.
Brad segir lykilinn vera þann að þau skyldu ákveða að halda upplýsingum varðandi skilnaðinn frá ljósi fjölmiðlanna, af tillitsemi við börnin.
„Við þurfum að segja þeim margt. Þau þurfa að skilja framtíðina, það sem er að gerast núna og hvers vegna við komumst á þennan stað. Það krefst þess að við skoðum ýmislegt úr fortíðinni sem við höfum hingað til ekki rætt. Markmið okkar er að allir komi sterkari og betri manneskjur út úr þessari reynslu.“
Heimilið í Hollywood Hills er ekki svipur hjá sjón eftir skilnaðinn. „Hér var alltaf líf og fjör, raddir og hljóð úr öllum hornum.“ Já hann virðist frekar leiður yfir þessu öllu.
Þó segir hann að einveran hafi verið sér holl, og gert sér kleift að horfast í augu við það sem kom honum í þessar ógöngur. „Ég man eftir að hafa hugsað áður þegar fréttir bárust af einhverjum skandal – „Guði sé þökk fyrir að ég þurfi aldrei framar að eiga þátt í svona löguðu“. Hann segir að eftir skilnaðinn hafi hann meðal annars lært að hann er gjarn á að loka sig af. „Ég þarf að vera aðgengilegri, sérstaklega fyrir ástvini mína.“
