Við lifum sannarlega á gullöld sjónvarpins. Fyrir nokkrum árum síðan hefði engum dottið það í hug að tvær konur sem hlotið hafa Óskar fyrir besta leik í aðalhlutverki myndu láta bjóða sér litla skjáinn. Það er hins vegar þannig sem hlutirnir eru í þáttunum Big Little Lies. Þar fara þær Reese Witherspoon og Nicole Kidman á kostum ásamt einvalaliði leikara. Þættirnir byggja á bók ástralska rithöfundarins Liane Moriarty sem ber sama titil og kom út árið 2014. Þeir eru framleiddir af bandaríska kapalrisanum HBO.

Það er enginn smá kanóna úr bandarískri sjónvarpsþáttagerð sem skrifaði þessa sjö þátta míníseríu upp úr bókunum. Það er sjálfur David E. Kelly sem er heilinn á bak við þætti á borð við Practice, Ally McBeal, Boston Public og Boston Legal svo nokkrir séu nefndir. Hann hefur átt nokkuð mögur ár undanfarið og átt erfitt að fóta sig í nýju umhverfi sjónvarpsins en hann sýnir það með þessum þáttum að hann hefur engu gleymt.

Þemalag þáttanna, Cold Little Heart með Michael Kiwanuka

Liane Moriarty á auðvitað mestan heiðurinn enda þykir bókin frábær lesning sem erfitt er að leggja frá sér. Kelly tekst að koma þeirri tilfinningu til skila í þáttunum og er óhætt að segja að áhorfendur bíði með öndina í hálsinum.

Leikstjórinn er heldur enginn aukvisi. Það er hinn fransk-kanadíski leikstjórinn Jean-Marc Vallée sem leikstýrði Dallas Buyers Club en Matthew McConaughey og Jared Leto fengu Óskarsverðlaun fyrir leik sinn í henni.

Þættirnir gefa manni lítið, en nóg í hvert skipti svo áhuginn haldist. Þetta eru þó ekki þættir sem enda alltaf með kjánalegum cliffhanger eins og til að mynda Lost eða Big Little Liars. Spennan er bara byggð upp stöðugt og það verður eitthvað þegar undan lætur.

Það er betra að gefa ekkert of mikið upp um söguþráðinn en það má í grófum dráttum segja að þættirnir segi frá lífi mæðra í vel stæðum hluta Kaliforníu. Börn þeirra ganga í sama skóla og þannig skarast líf ólíkra fjölskyldna með eftirminnilegum hætti. Þegar ég kynnti mér þættina fyrst var ég efins, enn einn þátturinn um hvað það er erfitt að vera ríkur, hvítur og gagnkynhneigður í Bandaríkjunum. Þær áhyggjur voru óþarfar. Vandamálin sem foreldrar og sérstaklega mæður glíma við eru á margan hátt lík um allan heim þó að það hjálpi auðvitað að eiga hús við strendur Kyrrahafsins og nýjasta sportjeppann.

Auk áðurnefndra leikkvenna fara Shailene Woodley, Zoe Kravitz, Laura Dern, Adam Scott og Alexander Skarsgard með hlutverk í þáttunum. Enginn smá hópur. Að öðrum ólöstuðum er Skarsgard einfaldlega magnaður í hlutverki sínu sem hinn ungi, myndarlegi og stjórnsami eiginmaður karakters Nicole Kidman. Það er líka gaman að sjá Lauru Dern en hún er mögnuð leikkona og hefur alltaf verið. Adam Scott kemur líka á óvart í alvarlegu hlutverki en hann er þekktari fyrir að leika í léttara efni. Börnin sem leika í þáttunum eru líka flest afar frambærileg.

Það er því óhætt að mæla með því að lesendur Bleikt kíki á Big Little Lies enda er aðeins um sjö þætti að ræða, um 50 mínútur hver. Þetta er ekki skuldbinding upp á fimm tuttugu þátta seríu.

Big Little Lies eru sýndir á sunnudagskvöldum á Stöð 2.