Benedikt Heiðar er hraustur og glaður 5 mánaða strákur. Í sex vikna skoðun kom í ljós að hann sá mjög illa og þurfti á gleraugum að halda. „Þetta var mjög greinilegt því hann vildi aldrei horfa á eitthvað sem var nálægt honum, heldur sneri sér undan. Systir hans, sem er tveggja ára, var mjög hissa á því að hann skyldi ekki brosa til hennar heldur víkja sér undan ef hún kom of nálægt,“ segir Telma Ýr Birgisdóttir móðir Benedikts Heiðars í samtali við Bleikt.

Fyrir rúmri viku Breyttist lif Benedikts Heiðars og allrar fjölskyldunnar þegar han fékk gleraugun sín. Það var mikil eftirvænting hjá foreldrunum, Telmu og Boga Benediktssyni, sem fóru með hann í gleraugnabúðina í Smáralind og þau ákváðu að taka upp myndband af því þegar Benedikt fengi gleraugun á sig.

„Það gekk ekki til að byrja með þar sem gleraugun meiddu hann. Svo eftir að þau voru stillt í búðinni fórum við í hnoðrakot. Þar tók ég hann í fangið og þá upplifðum við fullkomna augnablikið!“

Telma segir að breytingin hafi verið stórkostleg „Benedikt Heiðar hefur alltaf snúið sér frá ef maður kemur of nálægt, en þarna horfði hann á mig, teygði hendurnar til mín og strauk mig í framan, Bogi tók þá upp símann og tók myndbandið.“

Telma segir framfarir Benedikts Heiðars stórkostlegar síðan hann fékk gleraugun.

„Hann spjallar og spjallar, heldur í hluti, farinn að snúa sér upp á hliðarnar, setur allt uppí sig, líka snuðið og er farinn að frussa! svo má ekki gleyma öllum dásamlegu brosunum.“

Tengslin við stóru systur hafa líka tekið stökk upp á við. „Það er svo fallegt hvað þau systkinin eru að ná saman núna eftir að hann fór að sjá systur sína betur. Við erum ekkert smá stolt af þessum dásamlega dreng!“ Segir Telma að lokum