Ertu ofurfyrirsæta eða milljónamæringur? Hefur þú tekið eftir litlu S-i efst á skjánum hjá þér inni á Tinder? Það lítur svona út:
Nú er nefnilega komin leyniútgáfa af Tinder fyrir þá sem eru sérstaklega fagrir eða ríkir. Þessi hliðarveruleiki, sem er hulinn sauðsvörtum almúganum, kallast Tinder Select, og eina leiðin til að vera með er að vera boðið þangað.
Samkvæmt vefnum Tech Crunch hefur fyrirbærið verið til í um hálft ár og fjöldi TS notenda hefur vaxið hægt og bítandi í kyrrþey. Heimildamaður vefsins segir TS vera fyrir „fræga fólkið og þá sem njóta mikilla vinsælda á venjulegu Tinder útgáfunni“.
TS er ekki aðskilið forrit, heldur mætti kalla það eitt lag í viðbót – og hægt er að kveikja og slökkva á því að vild, eftir því hvort maður er í stuði til að hitta stórstjörnu eða dauðlegan einstaling.
Ekki er ljóst á þessu stigi hvernig Tinder velur þá sem fá boð inn á TS. Samkvæmt Tech Crunch eru núverandi notendur framkvæmdastjórar, súpermódel og sérdeilis aðlaðandi einstaklingar, og fólk á uppleið. OK!
Við dauðlega fólkið virðumst ekki geta svindlað okkur inn. Þeir sem fá boð geta tilnefnt einn annan einstakling til að ganga með sér inn um hinar forboðnu dyr… en viðkomandi þarf þá að vera sjúklega ríkur eða frægur eða eitthvað.
Ef þú sérð einhvern „swipa“ á Tinder í símanum sínum í dökkbláu umhverfi, í stað appelsínugula litarins sem einkennir Tinder dauðlega fólksins – þá veistu að þetta er súperstjarna að „swipa“ á Tinder Select.
