Erna Kristín listakona og bloggari stóð fyrir frábæru framtaki núna í desember en hún setti af stað söfnun fyrir meðferð á vannærðum ungabörnum. Lofaði hún að raka af sér hárið ef hún myndi ná að safna tveimur milljónum fyrir áramótin. Það tókst ekki en Erna Kristín er samt virkilega ánægð með árangurinn sem rennur til Nígeríu í gegnum UNICEF.

Erna Kristín Safnaði rúmlega 1,7 milljón fyrir áramótin. Í samtali við Bleikt sagði hún að þessi viðbrögð Íslendinga við söfnuninni hennar hafi ekki komið á óvart. „Ég tel flesta Íslendinga vera hjálpsama og tilbúna til þess að aðstoða þá sem þurfa. Viðbrögðin voru alveg í takt við það.“

„Hárið fær að vera en það hefði farið ef safnast hefðu tvær milljónir“ segir Erna Kristín. „Það hefði auðvitað verið frábært að ná tveimur milljónum, aðallega vegna þess að þá hefði fleiri börn fengið að lifa. Ég hefði rakað hárið af með glöðu geði þótt það sé auðvitað ákveðinn léttir að halda því,“ viðurkennir Erna Kristín. Hún segir að það hafi komið á óvart hversu margir hafi verið til í að aðstoða hana með söfnunina.

Það gekk á ýmsu á meðan söfnuninni stóð, eitt sinn seldi Erna Kristín listaverk en þegar hún ætlaði að koma því til kaupandans sagðist viðkomandi hafa tekið þátt í uppboðinu „í gríni“ sem auðvitað kom henni í uppnám. En flestir tóku vel í þetta og safnaðist rúmlega 1,7 milljón eins og áður kom fram. Hún segir að erfiðast í þessu ferli hafi samt verið að hugsa til barnanna sem hún var að safna fyrir.

„Upphæðin sem ég safnaði fer í meðferð fyrir vannærð ungabörn sem í 99 prósent tilfella leiðir til bata,“ segir Erna Kristín um það hvert söfnunarféð fer. Hún notaði mikið samfélagsmiðilinn Snapchat til þess að vekja athygli á þessum málstað en hún er þar með þúsundir fylgjenda. „Ég vil þakka aftur fyrir stuðninginn og hjálpina við söfnunina og öll fallegu skilaboðin sem ég fékk,“ segir Erna Kristín ánægð að lokum.

Hægt er að fylgjast með Ernu á Snapchat: ernuland