Miðvikudaginn 1. ágúst mun breska popp goðsögnin Billy Idol troða upp í Laugardalshöllinni. Idol hefur verið starfandi í tónlist í yfir fjörutíu ár en frægðarsól hans skein skærust á níunda áratugnum. Hann mun flytja öll sín þekktustu lög eins og „Rebel yell“, „White Wedding“ og „Mony Mony“ með sínum einstaka krafti og sjarma. Með honum verður gítarleikarinn Steve Stevens sem meðal annars hefur unnið með Michael Jackson.

Ný íslensk hljómsveit, Rock Paper Sisters, með Eurovision farann Eyþór Inga Gunnlaugsson fremstan í flokki mun hita salinn upp og Eyþór segist spenntur fyrir kvöldinu. Sjálfur á hann tengingu við Billy Idol frá sínum fyrstu árum í tónlist.

Eftirpartí á Fiskideginum mikla

„Ég helt mest upp á Rebel Yell. Það er vegna þess að lagið var á prógramminu í fyrstu ball hljómsveitinni sem ég var í, Appolo frá Ísafirði. Ég flaug þá til Ísafjarðar og spilaði á skólaböllum. Rebel Yell var alltaf á setlistanum.“

Hvernig band er Rock Paper Sisters?

„Þetta er bara rokk og ról, kröftugt og upptempó. Þarna eru með mér Þorsteinn bassaleikari úr Volcanova, Jónbi trommari úr Brain Police og kirkjuorganistinn Þórður.“

Hvernig varð bandið til?

„Eins og allir góðir hlutir þá varð það til í eftirpartíi“ segir Eyþór og hlær. „Á Fiskideginum á Dalvík í fyrra. Þorsteinn og Jónbi komu og spurðu mig hvort ég vildi ekki gera eitthvað. Við fórum að ræða saman og mér fannst sniðugt að stofna svolítið hugsunarlausa hljómsveit þar sem maður mætir í bílskúrinn eins og í gamla daga, djammar hlutina til og er ekkert að ofhugsa þetta. Við erum ekkert að pæla of mikið í hvort þetta sé nógu frumlegt eða neitt svoleiðis. Við spilum bara og höfum gaman.“

Eyþór gerir ráð fyrir að hljómsveitin spili í um það bil hálftíma.

„Þetta er svolítið bilað. Við erum rétt búnir að klára að semja upp í settið. Þetta getur ekki verið nýrri sveit eða nýrri lög sem verða flutt þarna.“

Rock Paper Sisters hafa þegar gefið út eitt lag á Spotify og Youtube og ber það heitið Howling Fool.