Á vefmiðlinum Cineuropa segir gagnrýnandinn Fabien Lemercier kvikmyndina sanna að velgengni fyrri myndar Benedikts, Hross í oss, hafi ekki verið nein tilviljun. „Í stuttu máli er þetta feminísk mynd þar sem ekki vantar speglun á samfélagið en nálgunin á efninu er stórskemmtileg,“ skrifar hann í umfjölluninni og hrósar Benedikt fyrir að taka myndina ekki of alvarlega.
Jordan Mintzer hjá Hollywood Reporter tekur fram að umbúðirnar séu til fyrirmyndar og lýsir myndinni sem sjónrænni veislu þar sem stutt er í húmor og sniðugar fléttur.
Jay Weissberg, gagnrýnandi hjá Variety, spáir myndinni mikilli velgengni á heimsvísu og spyr: „Er til eitthvað sjaldgæfara heldur en snjöll vellíðunarmynd sem fjallar um mikilvæg umhverfismál með húmor og fullnægjandi réttlætisskyn?“ Weissberg segir myndina falla undir þessa lýsingu og nefnir hann einnig kvikmyndatökumanninn Bergstein Björgúlfsson, sem hann kallar algjöran meistara í því að fanga lágstemmda fegurð íslensks landslags.
Dómur Screen Daily hrósar Halldóru Geirharðsdóttur fyrir frábæran leik í krefjandi hlutverki en Halldóra leikur einnig tvíburasystur Höllu í myndinni. Þykir greinarhöfundi líklegt að myndin njóti ágætrar velgengni, sérstaklega á meðal kvenna.
Breski miðillinn The Guardian birti einnig sinn dóm en þar er gagnrýnandinn Peter Bradshaw ekki jafn hrifinn og hinir. Hann gefur þrjár stjörnur af fimm mögulegum og ritar að myndin sé almennt vel leikin og búi yfir skemmtilegum stíl en að leikstjórinn tapi sér aðeins of mikið í gríninu.
Myndin segir frá Höllu (leikin af Halldóru Geirharðsdóttur), miðaldra kórstjóra sem lýsir yfir stríði gegn stóriðju í landinu og gerist skemmdarverkamaður. Lífið breytist snöggt þegar hún fréttir af munaðarlausri stúlku í Úkraínu og þarf þá að ákveða hvort eigi að bjarga þessu eina barni eða halda sinni baráttu áfram.
Stikluna fyrir myndina má sjá hér að neðan, en áætlaður frumsýningardagur hérlendis er 23. maí.
