Alþjóðlegi sönghópurinn Olga Vocal Ensemble mun koma fram á Sumartónleikum í Akureyrarkirkju sunnudaginn 15. júlí kl. 17.
Þema tónleikanna er femínismi og bera þeir yfirskriftina It’s a Woman’s World þar sem listakonum síðustu 1000 ára er fagnað. Á efnisskránni eru meðal annars lög eftir Hildgard von Bingen sem fædd var árið 1098 og Barböru Strozzi sem var uppi á 16. öld. Flutt verða lög sem eru hvað þekkust í flutningi frægra söngkvenna, til dæmis Ninu Simone, Édith Piaf og Billie Holliday. Á efnisskránni eru fjögur lög sem samin voru sérstaklega fyrir Olgu. Fjölbreytni í lagavali og tónlistarstíl ræður ríkjum og allir ættu að finna eitthvað við sitt hæfi.
Sönghópurinn hefur verið starfræktur síðan árið 2012 en hópurinn hélt sína fyrstu tónleika á Íslandi sumarið 2013 og hefur heimsótt Ísland á hverju ári síðan þá. Hópurinn er skipaður 5 strákum sem allir eru búsettir í Hollandi. Í Olgu eru Hollendingarnar Jonathan Ploeg og Arjan Lienaerts, Englendingurinn Matthew Lawrence Smith, rússneski Bandaríkjamaðurinn Philip Barkhudarov og Íslendingurinn Pétur Oddbergur Heimisson.
Aðgangur er ókeypis og allir hjartanlega velkomnir
