Átta atriði sem komu spekingunum í opna skjöldu
Óskarsverðlaunin verða afhent í byrjun mars í 90. skipti og voru tilnefningar til þessara stærstu verðlauna ársins á sviði kvikmynda opinberaðar í gær. Ýmislegt kom sérfræðingum á óvart og hefur AP-fréttaveitan tekið saman átta atriði um það sem kom nokkuð flatt upp á marga.
Margir spáðu Wonder Woman góðu gengi en annað kom á daginn. Myndin var einkar vel sótt í kvikmyndahúsum í fyrrasumar og fékk þar að auki góða dóma. En myndin fékk ekki eina einustu tilnefningu til Óskarsverðlauna.
Það kom flatt upp á marga að sjá að Denzel Washington hefði fengið tilnefningu fyrir myndina Roman J. Israel, Esq. Myndinni gekk skelfilega í kvikmyndahúsum, fékk slæma dóma en samt fékk Denzel tilnefningu fyrir besta leik í aðalhlutverki.
Velgengni Netflix hefur aukist ár frá ári og hefur fyrirtækið staðið fyrir framleiðslu á vel heppnuðum þáttum og heimildarmyndum undanfarin misseri. Í ár fékk fyrsta leikna kvikmyndin úr smiðju Netflix Óskarsverðlaunatilnefningu en um er að ræða myndina Mudbound. Hún var tilnefnd til fjögurra verðlauna, þar á meðal fékk Mary J. Blige, sem er einna best þekkt fyrir tónlistarsköpun sína, tilnefningu fyrir best leik í aukahlutverki.
Það kom ýmsum á óvart að Paul Thomas Anderson hefði fengið tilnefningu sem besti leikstjórinn fyrir myndina Phantom Thread. Myndin er ekki beint eitthvert léttmeti en þykir þó afar vönduð og vel heppnuð. Paul Thomas á eflaust skilið að fá tilnefningu en ýmsir hafa klórað sér í kollinum yfir því að Steven Spielberg, fyrir myndina The Post, og Martin McDonagh, fyrir myndina Three Billboards Outside Ebbing, Missouri, hafi verið sniðgengnir.
Loksins kom að því að Steve James fengi tilnefningu fyrir bestu heimildarmyndina. James leikstýrði myndinni Hoop Dreams, sem er að margra mati ein besta heimildarmynd sögunnar, en hún hlaut ekki tilnefningu sem besta heimildarmyndin á sínum tíma. Þá var James aftur sniðgenginn fyrir myndina Life Itself. En í ár fékk hann loksins tilnefningu, nú fyrir myndina Abacus: Small Enough to Jail.
Eftir að umræðan um kynferðislega áreitni leikarans Kevins Spacey kom upp á yfirborðið voru góð ráð dýr fyrir leikstjórann Ridley Scott. Spacey átti að leika aðalhlutverkið í myndinni All the Money in the World, en sex vikum fyrir frumsýningu kom skuggaleg fortíð Spacey upp á yfirborðið. Scott brá á það ráð að skipta Spacey út fyrir Christopher Plummer og er óhætt að segja að það hafi borgað sig; Plummer fékk tilnefningu fyrir besta leik í aukahlutverki.
Óskarsverðlaununum hefur verið legið á hálsi fyrir að vera hátíð hvítra leikara. Það hefur eitthvað breyst á undanförnum árum, eða hvað? Athygli vekur að frá árinu 2012 hefur enginn leikari sem á rætur að rekja til spænskumælandi landa (e. Latino) fengið tilnefningu. Raunar hafa aðeins þrír leikarar fengið tilnefningu á síðustu 20 árum; Penelope Cruz, Javier Bardem og Benicio Del Toro. Margir bjuggust við að Salma Hayek fengi tilnefningu fyrir myndina Beatriz at Dinner en annað kom á daginn.
The Boss Baby, eða Stubbur stjóri, er tilnefnd til verðlauna sem besta teiknimyndin. Eflaust fannst ungu kynslóðinni myndin skemmtileg en það breytir þó ekki þeirri staðreynd að gagnrýnendur voru ekki beint hrifnir af henni. Til að mynda er myndin með einkunnina 53% á Rotten Tomatoes og 50 af 100 á Metacritic.
