Sindri Freysson hlýtur Ljóðstaf Jóns úr Vör
Sindri Freysson fékk í gær, sunndaginn 21. janúar, afhentan Ljóðstaf Jóns úr Vör fyrir ljóðið „Kínversk stúlka les uppi á jökli“. Annað sæti í ljóðasamkeppninni hlaut Hrafnhildur Þórhallsdóttir fyrir ljóð sitt „Elegía“ og Valgerður Benediktsdóttir lenti í þriðja sætið með ljóðið „Íshvarf“.
Þetta er í sautjánda sinn sem Ljóðstafur Jóns úr Vör er afhentur á fæðingadegi skáldsins, en það er Lista- og menningarráð Kópavogs sem stendur fyrir ljóðasamkeppninni og er hún hluti af Ljóðahátíð í Kópavogsbæ. Handhafi Ljóðstafsins fær farandgrip – forláta göngustaf – til varðveislu í eitt ár, verðlaunagrip til eignar og 300.000 króna peningaverðlaun. 200.000 krónur eru í verðlaun fyrir annað sætið og 100.000 fyrir það þriðja.
Í umsögn dómnefndarinnar um ljóð Sindra segir meðal ananrs: „Í ljóðinu birtast skýrar myndir af óvenjulegum aðstæðum sem vöktu strax athygli dómnefndarfólks. Ljóðið kallar fram myndir af ólíkum heimum, andstæðum; borgarumhverfi, brautarpöllum og hraða er telft á móti kyrrstöðu sem ríkir á óskilgreindum jökli þar sem rúta situr föst.“
Fyrir utan verðlaunaljóðin þrjú hlutu átta ljóð sérstakar viðurkenningar dómnefndar. Þær hlutu Halla Oddný Magnúsdóttir fyrir „Ástaljóð frá Alexandríu,“ Sindri Freysson fyrir ljóðin „Ekkert að óttast“ og „Vikumenn“, Hallgrímur Helgason fyrir ljóðin „Ég og hún“ og „Portúgölsk pera“, Eyþór Gylfason fyrir ljóðið „Hvítt suð“, Pedro Gunnlaugur Garcia fyrir ljóðið „Leikbrúður“, Margrét Hlín Sveinsdóttir fyrir ljóðið „Postulínshundurinn“, Steinunn Lilja Emilsdóttir fyrir ljóðið „Vitleysa“ og Ásgeir H. Ingólfsson fyrir ljóðið „Þeir skjóta þig alltaf í bakið.“
Á sama tíma var tilkynnt um úrslit í ljóðasamkeppni grunnskólanna í Kópavogi. Þar var það Henrik Hermannsson, nemandi í 7. bekk í Hörðuvallaskóla, sem hlaut fyrstu verðlaun fyrir ljóðið „Myrkrið“. Í öðru sæti var ljóðið „Frelsi“ eftir Eyrúnu Flosadóttur, nemanda í 9. MSJ í Kársnesskóla. Ljóðið „Allt eða ekkert“ eftir Söndru Diljá Kristinsdóttur var í þriðja sæti en Sandra er í 8. bekk Salaskóla.
Í dómnefndinni sátu skáldin Anton Helgi Jónsson, Ásdís Óladóttir og Bjarni Bjarnason.
eftir Sindra Freysson
Í þessu landi
leynast engir brautarpallar
með þokuskuggum að bíða tvífara sinna
Engar mystískar næturlestir
sniglast gegnum myrkrið á hraða draumsins
Engir stálteinar syngja
fjarskanum saknaðaróð
Í þessu landi
situr rúta föst á jökli
Hrímgaðar rúður
Framljósaskíma að slokkna
Frosin hjól að sökkva
Andgufa sofandi farþega
setur upp draugaleikrit
Og á aftasta bekk
les kínversk stúlka
um lestargöng sem opnast og lokast
einsog svart blóm
