Í vor gaf Menntamálastofnun út bókina Náttfiðrildi eftir Stefán Mána. Bókina skrifaði Stefán Máni sérstaklega fyrir stofnunina og er hún ætluð börnum og unglingum á miðstigi grunnskóla.

Morð er framið í Reykjavík og unglingur sem á við geðræn vandamál að stríða er grunaður um verknaðinn. Ekki er allt sem sýnist og stundum rennur raunveruleikinn saman við hugrenningar unglingsins.

„Ég hvet alla krakka til að lesa hana, og ég hvet bæði foreldra og kennara til að laumast í bókina því hún leynir á sér og lesendur mínir gætu hugsanlega kannast við eina persónuna í henni.;) Ég vandaði mig mjög við skrifin (eins og alltaf) því ég vildi að krakkarnir fengju svona einu sinni almennilega sögu til að lesa, spennandi og metnaðarfulla, en ekki bara enn eina barnalegu „unglinga“-bókina. Þannig að – njótið!,“ skrifar Stefán Máni á Facebook-síðu sína í vor.

Bókin er nú komin út sem rafbók og geta því allir lesið bókina, bæði börn, unglingar og fullorðnir.

Myndskreytingar eru eftir Kristínu Rögnu Gunnarsdóttur.

Náttfiðrildi má lesa hér.