Þjóðleikhúsið heldur uppteknum hætti frá fyrri árum og býður börnum um land allt í leikhús. Að þessu sinni er það brúðumeistarinn Bernd Ogrodnik sem sýnir börnunum sjö stutta leikþætti. Handunnar trébrúður hans og heillandi töfrabrögð kalla fram eftirvæntingu og kátínu ungra leikhúsgesta.

Börnum á landsbyggðinni í elstu bekkjum leikskóla og yngstu bekkjum grunnskóla verður boðið á sýninguna, en Þjóðleikhúsið leggur mikla áherslu á að kynna leikhúsið börnum óháð búsetu og efnahag. Fyrsta sýningin var á Selfossi, þann 31. ágúst síðastliðin, og í kjölfarið heldur Bernd til Akraness, Ólafsvíkur, Búðardals, Patreksfjarðar, Ísafjarðar, Sauðárkróks, Akureyrar, Húsavíkur, Vopnafjarðar og víðar. Leikritið er sýnt á 15 stöðum fyrstu níu daga leikferðarinnar.

Sýningar í Reykjavík hefjast í Leikhúskjallaranum þann 9. október, en tíunda árið í röð býður Þjóðleikhúsið börnum í elstu deildum leikskóla á höfuðborgarsvæðinu í heimsókn í leikhúsið með kennurum sínum til að kynnast töfraheimi leikhússins.

Þjóðleikhúsið hefur allt frá upphafi lagt mikla áherslu á barnasýningar og leikhúsuppeldi með glæsilegum sýningum á Stóra sviðinu, og í gegnum tíðina hefur einnig verið boðið upp á heillandi barnasýningar á minni sviðunum. Með Sögustund vill Þjóðleikhúsið leggja sitt af mörkum til að kynna börnum heim leikhússins, því að leikhúsferðir geta veitt ungum sem öldnum mikla gleði, örvað þroska og eflt hæfileika okkar til að takast á við lífið og tilfinningar okkar.

Verkið er sýnt í samstarfi við Brúðuheima.