Heimildarmyndin, Nýjar hendur, innan seilingar, um sögu Guðmundar Felix Grétarssonar, er nú í sýningum í Bíó Paradís.
Eftir að hafa misst báða handleggi í slysi, berst Guðmundur Felix fyrir því að vera fyrsti maðurinn í heiminum sem fær grædda á sig nýja handleggi. Baráttan tekur á og er tímafrek, endalaus bið en lífið heldur áfram. Hann finnur ástina, verður afi, flytur til Frakklands og bíður og bíður eftir nýjum höndum sem eru jú, innan seilingar.
Stórmerkileg saga Íslendings sem gengið hefur í gegnum ótrúlega atburði með húmor og lífsbaráttuna að vopni.
Myndin inniheldur atriði sem vakið geta óhug hjá börnum og viðkvæmu fólki.
Leikstjórar myndarinnar eru hinir margverðlaunuðu Markelsbræður, heimildamyndaleikstjórarnir Örn Marinó Arnarson og Þorkell Harðarson. Myndin hefur tekið mörg ár í vinnslu þar sem bræðurnir hafa fylgt Guðmundi Felix eftir hvert fótmál í ígræðsluferlinu.
Heimildamyndin NÝJAR HENDUR er um 63 mínútna löng, framleidd af Ljósop ehf ásamt Markell Productions og Bellota Film í samvinnu við RÚV og France 5.
