Nýjasta kvikmynd leikstjórans og handritshöfundarins Baldvins Z, Lof mér að falla, verður frumsýnd á föstudag, en myndin er byggð á sönnum atburðum.

Myndin segir frá hinni fimmtán ára Magneu (Elín Sif Halldórsdóttir), sem kynnist Stellu (Eyrún Björk Jakobsdóttir), sem er átján ára, og þróar sterkar tilfinningar til hennar. Stella notfærir sér þetta og leiðir Magneu inn í grimman heim sem tekur toll af þeim báðum. Sagan gerist yfir margra ára skeið og gengur út á örlagarík uppgjör, minningar og kaldan veruleika fíkninnar og aðstandenda ungmenna í neyslu.

Myndin hefur verið valin á Kvikmyndahátíðina í Toronto sem fram fer 6.-16.september.

Elín Sif Halldórsdóttir, sem leikur Magneu, var í viðtali í DV í ágúst. Blaðamaður DV ræddi við Elínu um áhugasvið hennar, brautina fram undan, erfiðar raunir og hvar hjartað liggur hjá ungri listakonu með allan heiminn og ferilinn frammi fyrir sér. Í viðtalinu segir hún meðal annars að hlutverkið hafi verið henni gríðarleg áskorun og hefur hún varað afa sinn við því að horfa á lokaafraksturinn.

DV gat ekki setið á sér að birta dóm um myndina, sem lesa má hér.