Framleiðsla er hafin á kvikmynd um Mulan, leikinni kvikmynd frá Disney sem byggir lauslega á samnefndri verðlaunateiknimynd frá árinu 1998. Rétt eins og upprunalega teiknimyndin er um að ræða kínverska þjóðsögu um unga stríðshetju sem dulbýr sig sem karlmann.
Disney birti fyrstu ljósmyndina frá framleiðslu myndarinnar á samfélagsmiðlinum Twitter en þar sést leikkonan Yifei Liu með sverð á lofti í titilhlutverkinu.
Production has begun on live-action #Mulan! pic.twitter.com/o4nROnyw4H
— Disney (@Disney) August 13, 2018
Leikstjóri nýju Mulan-myndarinnar er Niki Caro, en hún sá meðal annars um kvikmyndirnar Whale Rider, North Country og The Zookeeper’s Wife. Tökur myndarinnar eru nýhafnar og fara fram í Kína og í Nýja Sjálandi. Á meðal annarra leikenda í myndinni verða Jet Li, Gong Li, Donnie Yen og Jason Scott Lee.
Caro birti annars vegar einnig fyrstu ljósmyndina af tökustað á Instagram-síðunni sinni.
Myndin er væntanleg í bíóhús hér á Íslandi 27. mars 2020. Ekki er enn vitað hvort um söngleik verði að ræða, en aðstandendur hafa ekki gefið skýrt svar við því. Leikstýran sagði hins vegar í viðtali við The Hollywood Reporter í vor að ekki væri enn komið á hreint hvaða rullu tónlistin mun spila, eða hversu mikið af upprunalegu lögunum munu rata í endurgerðina.
Aðdáendur upprunalegu myndarinnar bíða þó ólmir eftir því hvort lagið I’ll Make a Man out of You fái að fljóta með í þeirri nýju.
Hér er lagið á íslensku.
