Það er kominn 16. maí og þó að sumarið eigi að vera komið samkvæmt dagatalinu þá lætur það eitthvað bíða eftir sér. Það er líka kannski algjör óþarfi að vera að spá í sumri,sól og útilegum og fara frekar að spá í jólatónleikum.

Byrjað er að auglýsa jólatónleika og hefst sala á þá fyrstu eftir viku. Það eru tónleikar hinnar norsku Sissel Kyrkjebø sem kemur til landsins þriðja árið í röð, en uppselt hefur verið á alla fyrri tónleika hennar.

Björgvin Halldórsson er einnig búinn að taka frá og auglýsa dagsetningar fyrir Jólagesti Björgvins, en ekki er byrjað að auglýsa miðasölu fyrir þá.

Það er því ekki seinna vænna að taka fram dagatalið og debet- eða kreditkortið og ákveða hvar þú ætlar að verja kvöldunum í desember.