Spjallið fer fram á ensku og allir eru velkomnir meðan húsrúm leyfir.
Nánar: Minni, hvað er það? Öll eigum við minningar. Við deilum þeim með vinum og fjölskyldu, við gleymum okkur jafnvel í fortíðarþrá. Hópar og þjóðir eiga sér líka sameiginlegar minningar sem geta þá orðið pólitískar.
Hvað einkennir sameiginlegar minningar? Eru hörmungar nauðsynlegt fóður þeirra? Eða er hamingjusamt fólk líklegt til að horfa til framtíðar og skilja við óþægilegar eða flóknar minningar? Hvaða tilgangi þjóna bókmenntirnar í þessu samhengi?
Samtal þeirra Stans og Gauta mun snerta á minningum, skáldskap og málefnum Evrópu í dag í samhengi við það sem sagt var hér að framan og er líka hugsað sem vettvangur fyrir hugmyndaskipti og samræðu. Gestir eru því hvattir til að taka þátt í samtalinu.
Stanislaw (Stan) Strasburger er skáldsagnahöfundur, pistlahöfundur og menningarstjórnandi. Hann er gestarithöfundur í Gröndalshúsi í apríl og maí 2018 á vegum Bókmenntaborgarinnar og Goethe stofnunar í Kaupmannahöfn.
Hér vinnur hann að efnisöflun fyrir skáldsögu sem hann er með í smíðum en ein persóna hennar er Íslendingurinn Gunnar, sem býr í Bremen í Þýskalandi. Hann gengur í gegnum erfiðleika í sambandinu við kærustuna, sem er frá Beirút.
Sjálfskoðun Gunnars leiðir hann að vangaveltum um fortíðina og þar grefur hann sífellt dýpra í eigin minningar og minningar fjölskyldu sinnar. Ein formæðra Gunnars er Guðríður Símonardóttir og saga hennar og “Tyrkjaránsins” tekur að leita á hann.
Í verkum sínum og persónulegu lífi beinir Stan sjónum að borgarlífi í Evrópu og fyrir botni Miðjarðarhafs og tengslunum þar á milli. Þar koma við sögu borgirnar Varsjá (fæðingarborg hans), Berlín (þar sem hann býr í dag), Köln, Granada, Beirút, Aleppo og Damascus. Hann tekur einnig virkan þátt í samræðu um framtíð Evrópu, svo sem um Evrópusambandið og þjóðernisstefnu eða –kennd, fólksflutninga og flóttamenn á okkar dögum svo og um sameiginlegar minningar hópar og þjóða.
Síðast en ekki síst er Pólland og staða landsins innan Evrópu honum hugleikið svo og málefni Mið-Austurlanda, ekki síst í tengslum við fólksflutninga í dag. Stan skrifar á þýsku en talar einnig pólsku og arabísku og hafa verk eftir hann komið út á þeim málum.
Á meðan á dvölinni í Reykjavík stendur bloggar Stan á þýsku á vef Goethe stofnunnar.
Sjá meira um Stan og verk hans á Facebook síðu hans.
Skáldsögurnar „The Story Seller“ og „Obsession. Lebanon“ eftir Stan verða til sölu á viðburðinum á þýsku, pólsku og arabísku. Engin kort, svo áhugasamir komi með peninga.
___
Gestarithöfundur í Bókmenntaborg – Höfundaspjall í Gröndalshúsi – Höfundaspjall í Gröndalshúsi með Stan Strasburger.
8. maí 2018, kl. 17 – Gröndalshús, við Fishersund.
[googlemaps https://www.google.com/maps/embed?pb=!1m18!1m12!1m3!1d1739.7124283439193!2d-21.944943483713526!3d64.14863772268755!2m3!1f0!2f0!3f0!3m2!1i1024!2i768!4f13.1!3m3!1m2!1s0x48d60b2cffcce4f1%3A0x9fe7f915de8cc04f!2zR3LDtm5kYWxzaMO6cw!5e0!3m2!1sis!2sis!4v1525351328962&w=600&h=450]
