Óskarsverðlaunin verða afhent næstkomandi sunnudagskvöld í Los Angeles. Hér eru nokkrir fróðleiksmolar um vinningshafa og þá sem tilnefndir hafa verið hvað oftast.
Allar myndir Cazale í fullri lengd tilnefndar Leikarinn John Cazale varð ekki langlífur, lést 42 ára gamall úr krabbameini. Hann lék í fimm kvikmyndum í fullri lengd og eftir lát hans voru gömul myndskot notuð í þeirri sjöttu. Allar þessar sex myndir voru tilnefndar til Óskarsverðlauna. Þrjár þeirra voru valdar besta myndin: Guðfaðirinn, Guðfaðirinn II og The Deer Hunter en þar lék Cazale á móti sambýliskonu sinni, Meryl Streep.
Streep á metið Enginn leikkona og leikari hefur hlotið fleiri tilnefningar til Óskarsverðlauna en Meryl Streep eða alls 20 en hún hefur þrisvar hlotið verðlaunin. Í ár er hún tilnefnd fyrir snjallan leik sinn í Florence Foster Jenkins. Sá karlleikari sem hlotið hefur flestar tilnefningar til Óskarsverðlauna er Jack Nicholson en tilnefningar hans eru tólf.
Vinnur Kevin loksins? Hljóðmaðurinn Kevin O'Connell hefur verið kallaður óheppnasti maður í sögu Óskarsverðlaunanna. Hann hefur tuttugu og einu sinni verið tilefndur til Óskarsverðlauna fyrir bestu hljóðsetningu en aldrei hlotið verðlaunin. Í ár er hann tilnefndur fyrir hljóðvinnu við mynd Mel Gibson, Hawksaw Ridge. Ekki nema von að margir haldi með honum. Sjálfur segist hann ekki velta verðlaunaveitingum mikið fyrir sér.
Hélt lengstu ræðuna Lengsta þakkarræða í sögu Óskarsverðlaunanna var flutt af Greer Garson þegar hún hlaut verðlaunin fyrir leik sinn í Frú Miniver. Hún talaði í 5 mínútur og 30 sekúndur. Síðan var sett regla um að þakkarræður mættu ekki vera lengri en 45 sekúndur. Stystu þakkarræðurnar fluttu William Holden, þegar hann fékk verðlaunin fyrir leik í Stalag 17, og Alfred Hitchcock, sem fékk heiðursverðlaun Akademíunnar. Báðir sögðu einfaldlega: „Þakka ykkur fyrir.“
Flestar tilnefningar Walt Disney er sá sem oftast hefur verið tilnefndur til Óskarsverðlauna, 59 sinnum. Hann hlaut 26 verðlaun á sínum langa og farsæla ferli, sem er met.
50 tilnefningar Á meðal núlifandi einstaklinga á tónskáldið John Williams metið þegar kemur að tilnefningum. Hann hefur verið tilnefndur 50 sinnum til Óskarsverðlauna og hlotið þau fimm sinnum. Einungis Walt Disney var tilnefndur oftar.
