Þeir sem hafa fyrir reglu að horfa á Sky-fréttastöðina geta ekki annað en tekið eftir fjölmiðlamönnunum Andrew Pierce og Kevin McGuire sem reglulega mæta í stúdíó og fara yfir fréttir vikunnar. Þarna eru sannarlega menn með ólíkar skoðanir. Pierce er íhaldsmaðurinn og McGuire vinstri maðurinn. Þeir eru hið fullkomna tvíeyki. Skoðanir þeirra á mönnum og málefnum eru yfirleitt afar ólíkar en þeir eru skarpir og snöggir til svara og hafa mikinn húmor. Góð kímnigáfa verður aldrei ofmetin.

Íhaldsmaðurinn Pierce er einn af þessum mönnum sem er alveg sama hvað öðrum finnst um þá. Hann er alls óhræddur við að segja skoðanir sínar (margar þeirra eru lítt til vinsælda fallnar) og virðist vera sérstakur andstæðingur forræðishyggju og pólitísks rétttrúnaðar (húrra fyrir því!). Hann er líka stálgreindur. Fáa hef ég séð sem hella svívirðingum yfir fólk á jafn fágaðan hátt og Pierce, sem er oft gríðarlega fyndinn. McGuire ranghvolfir þá yfirleitt augunum og setur upp þreytulegan svip til að lýsa vandlætingu sinni. Einstaka sinnum hefur hann þó skellt upp úr.

McGuire er einnig sérlega góður álitsgjafi og hefur líka sterkar skoðanir. Undanfarna mánuði hefur hann varla mætt í umræðurnar án þess að kalla Trump rasista og kvenhatara. Þar mælir hann af mikilli ákveðni. Pierce hendir gjarnan gaman að þessum málflutningi hans.

Það er skemmtilegt samspil á milli þessara tveggja ólíku manna. Þeir eiga til að deila hart, en það er líka hluti af leiknum. Þeir eru frábært tvíeyki. Örugglega fínir hvor í sínu lagi en fullkomnir saman.