Breska sjónvarpsstöðin ITV gerði nýlega könnun meðal Breta á hvaða lag Elton John væri í mestu uppáhaldi. Sjónvarpsstöðin sýndi síðan þátt þar sem niðurstaðan var kynnt og rætt við listamanninn, sem er orðinn sjötugur. Sömuleiðis var talað við vini hans og aðdáendur og vitanlega einnig samstarfsfélaga hans til áratuga, textahöfundinn Bernie Taupin. Elton John sagðist sjálfur búast við að lagið Candle in the Wind yrði hlutskarpast í þessari skoðanakönnun en það fór samt ekki þannig. Lag hans Your Song frá árinu 1970 lenti í fyrsta sæti, en Elton John segist hafa samið lagið á fimmtán mínútum.

Í öðru sæti var Candle in the Wind, hið margfræga lag sem hann samdi um Marilyn Monroe, en breytti síðan textanum og tileinkaði Díönu prinsessu og söng við útför hennar. Í þriðja sæti var Rocket Man. Lag sem börn hans tvö hafa mikið dálæti á, I’m Still Standing, lenti í því fjórða. Í fimmta sæti var hið vinsæla lag úr teiknimyndinni Lion King, Can You Feel the Love Tonight, en söngvarinn segir að það lag hafi fært honum fjölda nýrra aðdáenda. Lagið færði honum einnig Óskarsverðlaun á sínum tíma.