Annar þátturinn af London Spy sem RÚV sýnir á þriðjudagskvöldum brást ekki vonum. Hann var enn betri en sá fyrsti. Hinn ungi Danny er sannfærður um að ástmaður hans hafi verið myrtur og sneri sér til fjölmiðlamanna sem unnu ekki vinnuna sína heldur birtu frétt með stríðsletri um eiturlyfjaneyslu hans. Danny hitti fólk sem hann taldi vera foreldra ástmanns síns en það hagaði sér afar einkennilega og úr varð nokkuð hrollvekjandi atriði þegar hann áttaði sig á því að hann hafði verið blekktur.

Ben Whishaw er frábær í hlutverki Dannys, varnarlaus og í losti vegna dauða mannsins sem hann elskaði, en um leið staðráðinn í að komast að hinu sanna. Hann er hálf vankaður en hver myndi ekki vera það eftir að hafa fundið lík af ástinni sinni í kistu. Sannarlega trúverðug túlkun hjá góðum leikara. Whishaw fær góðan stuðning frá gömlu brýnunum Jim Broadbent og Charlotte Rampling sem bæði hafa afar sterka nærveru. Kvikmyndatakan er svo sér kapítuli en þar er sannarlega vandað til verka.

London Spy er ekki þáttur þar sem keyrt er á hraða. Hann er hægur en spennan er undirliggjandi. Áhorfandinn veit aldrei alveg á hverju hann á von. Allt getur sem sagt gerst.