Bresku sjónvarpsþáttunum Broadchurch er lokið. Þegar best lét sátu níu milljónir Breta límdar við skjáinn og fylgdust með fyrstu þáttaröðinni en nokkuð færri fylgdust með annarri og þriðju þáttaröð. Þættirnir voru sýndir í rúm fjögur ár.
Fyrsta þáttaröðin vann til allnokkurra verðlauna, þar á meðal BAFTA-verðlauna en Ólafur Arnalds fékk einmitt þau verðlaun fyrir tónlist sína við þættina. David Tennant og Olivia Colman fóru með aðalhlutverkin í þáttunum og léku þar lögreglumenn. Colman vann til margra virtra verðlauna fyrir frammistöðu sína í þeim, en hún þykir vera í hópi fremstu leikara Breta nú um stundir.
Lokaþátturinn var sýndur í Bretlandi í síðustu viku og þar kom ýmislegt á óvart. Mikil leynd hafði hvílt yfir sögulokum og handritshöfundurinn Chris Chibnall sagði ekki einu sinni fjölskyldu sinni hver væri hinn seki (eða seku). Hann segir það hafa verið tilfinningalega erfitt að skrifa síðustu þáttaröðina og segist hafa grátið við vinnu sína.
Þættirnir eru sýndir á Stöð 2 um þessar mundir.
