Jane Fonda, sem er 78 ára gömul, segir að sér hafi aldrei liðið betur en einmitt núna. Leikkonan er þrígift og þrífráskilin og eiginmennirnir Roger Vadim, Tom Hayden og Ted Turner héldu allir framhjá henni, sá síðastnefndi mánuði eftir brúðkaup þeirra. Nú býr hún með plötuframleiðandanum Richard Perry. Leikkonan segir að eftir skilnað sinn við Ted Turner hafi hún ákveðið að lifa í sátt við sjálfa sig. Hún segir að mistökin sem hún hafi gert í einkalífi hafi verið þau að hrífast af slæmu strákunum vegna þess að henni hefði þótt þeir spennandi. Hún hafi ekki áttað sig á því fyrr en seint og síðar meir hversu miklu máli góðvild skipti. Nú sé hún svo heppin að búa með manni sem sé góð persóna.

Fonda hefur nóg að gera og mun leika á móti Robert Redford í nýjum Netflix-sjónvarpsþætti, Our Souls, sem fjallar um tvö gamalmenni í smábæ. Bæði hafa misst maka sína og taka upp ástarsamband. Fonda og Redford hafa leikið saman í þremur kvikmyndum og leikarinn hefur sagt að vinátta þeirra sé djúp og sönn. Leikkonan tekur í sama streng. „Í hvert sinn sem við unnum saman varð ég skotin í honum,“ segir Fonda. Það eru rúm 30 ár síðan þau léku síðast saman, í myndinni The Electric Horseman. „Það snertir mig djúpt að vera að vinna með honum núna, þegar ég er að nálgast áttrætt og hann orðinn áttræður,“ segir Fonda.