Ólafur Ólafsson myndlistarmaður tók sig til og hannaði sína eigin landsliðsbúninga fyrir leik Íslands og Frakklands í vikunni, bæði bláan aðalbúning og hvítan varabúning.

„Ég hef alltaf haft gaman af fatahönnun, en þessar búningapælingar hjá mér byrjuðu í kringum riðlakeppnina fyrir EM og hafa síðan haldið áfram,“ segir hann í skriflegu svari til blaðamanns.

Ólafur hefur birt nokkrar teikningar af tillögum sínum um íslenska landsliðsbúninginn á Facebook-síðu sinni og gerði svo eintök af tveimur tillögunum í fullri stærð.

Mynd: Ólafur Ólafsson

Ólafur segist sjálfur hafa spilað fótbolta upp í annan flokk með FH og leiki nú með áhugamannaliðinu Tasmania Sport und Bühne í heimaborg sinni Berlín. „Heima spilaði ég með áhugamannaliðinu Kára fyrir mörgum árum, sem í voru aðallega leikarar og kvikmyndagerðarmenn, svo þjálfaði ég kvennaliðið Diva 88 á meðan ég var í masternáminu í myndlist í Hollandi,“ segir Ólafur um fótboltaferilinn.

Þegar Ólafur og samstarfskona hans, Libia Castro, sýndu á Feneyjatvíæringnum árið 2011 settu þau upp neon-skilti fyrir utan íslenska skálann sem sagði á ítölsku: „Landið þitt er ekki til,“ og hafa í kjölfarið sett verkið upp víðar um heim, meðal annars fyrir utan Listasafn Íslands. Því vaknar spurningin: er ekki erfitt að halda með landsliði þegar landið manns er ekki til?

„Lífið er fullt af mótsögnum,“ segir Ólafur og sendir broskall. „En það stendur líka „landið þitt er ekki til“ í skjaldarmerkinu á hvíta varabúningnum,“ bætir hann við.