Ása Helga Hjörleifsdóttir leikstýrir kvikmynd byggðri á verðlaunabók Guðbergs
Fyrr í mánuðinum hófust tökur á kvikmyndinni Svanurinn í leikstjórn Ásu Helgu Hjörleifsdóttur. DV fékk að skyggnast á bak við tjöldin við tökur á myndinni á bóndabænum Ytra-Hvarfi í Svarfaðardal við Eyjafjörð. Veðrið hefur leikið við tökuliðið og hafa heimamenn verið einkar hjálplegir að sögn aðstandenda myndarinnar. Í einu atriði myndarinnar fæðist kálfur og um þessar mundir er beðið eftir að kýr í sveitinni beri til þess að skipuleggja tökur í kringum það.
Kvikmyndin Svanurinn er byggð á samnefndri skáldsögu Guðbergs Bergssonar, sem hlaut Íslensku bókmenntaverðlaunin árið 1991. Þetta er fyrsta kvikmynd Ásu Helgu í fullri lengd, en stuttmyndir hennar hafa ferðast á hátíðir víða um heim. Svanurinn segir frá Sól, níu ára gamalli stúlku sem send er á sveitabæ til að vinna og þroskast, en verður í staðinn lykilþátttakandi í atburðarás sem hún skilur vart sjálf.
Gríma Valsdóttir leikur stúlkuna, en Þorvaldur Davíð Kristjánsson og Þuríður Blær Jóhannsdóttir fara með önnur aðalhlutverk. Þá koma Ingvar E. Sigurðsson og Katla Margrét Þorgeirsdóttir einnig við sögu. Myndin er framleidd af Vintage Pictures og aðalframleiðendur eru Hlín Jóhannesdóttir og Birgitta Björnsdóttir.
Tökur standar yfir fram í ágúst og verða hlutar myndarinnar teknir upp í Grindavík. Svanurinn verður frumsýnd á næsta ári.
