Það hafa orðið vaktaskipti á sjónvarpsskjánum á sunnudagskvöldum. Undanfarnar vikur hefur íslenska gamanþáttaröðin Ligeglad haldið mér og fjölmörgum Íslendingum límdum við skjáinn á sunnudagskvöldum. En á sunnudaginn var kvaddi þáttaröðin og verður að segjast að það eru leiðinleg tímamót en fór þar ein best heppnaða íslenska þáttaröð sögunnar. Ég fullyrði það. Anna Svava Knútsdóttir, Arnór Pálmi og félagar sem að Ligeglad standa mega hafa ævarandi þakkir fyrir vel unnin störf. Þátturinn státaði af svo dásamlega kolsvörtum húmor á köflum að ég hafði á orði að hinir dönsku Klovn-þættir væru héðan í frá bara eitthvað sem yrði varpað upp á altaristöfluna í messu á aðfangadag. Algjört „kidstuff“ í samanburði. Frábært sjónvarp og við heimtum meira af svona íslenskri gæðaframleiðslu.

Mynd: DV ehf / Sigtryggur Ari

Hins vegar eru sunnudagskvöldin ekki með öllu ónýt þrátt fyrir brotthvarf Ligeglad. Við vaktinni hefur tekið ný heimildaþáttaröð, Rapp í Reykjavík, í umsjón Dóra DNA. Það var djarft hjá Stöð 2 að stilla þættinum upp á móti Ligeglad þegar enn voru tveir þættir eftir af því góðgæti á RÚV, sem varð til þess að maður tók fyrstu tvo rappþættina á tímaflakki. En þar er virkilega áhugaverð og skemmtileg innsýn í hina blómstrandi rappsenu borgarinnar og listamönnum gerð ágæt skil. Rapparar eru teknir tali, þátturinn er skemmtilega brotinn upp, hraður og líflegur. Jafnvel þeir sem ekki eru forfallnir rappáhugamenn finna fyrir aðdráttaraflinu. Alveg eins og það eru ekki bara pönkarar sem fíla Rokk í Reykjavík. Þessir þættir gætu reynst áhugaverð og skemmtileg heimild í framtíðinni. Ég fullyrði það líka.
Enn eru fjórir þættir eftir af Rapp í Reykjavík, sem tekið hafa við sunnudagsvakt hins línulega sjónvarps á mínu heimili. Þeir brúa einnig bilið ágætlega fram á mánudagskvöld, þegar Game of Thrones ræður ríkjum.