Á miðvikudagskvöld verður sérstök umræðusýning á pólitísku grínheimildamyndinni Bob Roberts frá 1992 á vegum Róttæka sumarháskólans.

„Myndin er bráðfyndin en jafnframt mögnuð ádeila á bandarískt stjórnmálaástand og ekki síst þátt fjölmiðla í því,“ segir Pontus Järvstad, einn af skipuleggjendum sýningarinnar.

Það er bandaríski leikarinn Tim Robbins sem skrifar og leikstýrir myndinni, auk þess að leika titilhlutverkið.

„Myndin segir frá Bob Roberts, tónlistarmanni og milljónamæringi með fasískar tilhneigingar, og framboði hans til öldungadeildar bandaríska þingsins. Myndin er frá árinu 1992 en á sannarlega mikið erindi í dag, í aðdraganda forsetakosninganna í Bandaríkjunum. Okkur fannst góð hugmynd að sýna myndina, sem er vissulega ótrúlega skemmtileg og spjalla svo í kjölfarið saman um alvöru málsins,“ segir Pontus.

*Bob Roberts verður sýnd miðvikudaginn 16. mars klukkan 20.00 í húsnæði Bifrastar við Suðurgötu 10, aðgangur er ókeypis.