Á miðnætti í kvöld verður nýjasta kvikmyndin í hinni geysivinsælu Star Wars-kvikmyndaseríu, Rogue One, frumsýnd samtímis víða um heim. Rogue One gerist rétt áður en atburðir upprunalegu myndarinnar eiga sér stað og ku segja frá því hvernig uppreisnarmenn komust yfir teikningarnar keisaraveldisins af Helstirninu ógnvænlega. Það eru þó ekki sömu aðalpersónur og í hinum myndunum heldur er um að ræða eins konar hliðarsögu úr sama sagnaheimi – en fleiri slíkar myndir verða framleiddar á næstu árum. Leikstjóri myndarinnar er Gareth Edwards (Monsters og Godzilla) og meðal aðalleikara eru Felicity Jones, Mads Mikkelsen, Ben Mendelsohn og Forest Whitaker.

Myndin hefur fengið nokkuð góða dóma frá gagnrýnendum – og virðast flestir sammála um að hún muni gleðja gamla aðdáendur ævintýraheimsins en ekki endilega laða marga nýja að. Empire kallaði hana til dæmis „hina fullkomnu Star Wars-aðdáendamynd“ og Variety segir að „yngri áhorfendum muni leiðast, þeir verði ringlaðir, eða bæði. En fyrir fyrstu kynslóð Stjörnustríðsaðdáenda – sem var ekki nógu sátt með söguþætti I, II og III – sé Rogue One nákvæmlega sú forsaga sem þeir þráðu alltaf.“ The Guardian og Telegraph gefa myndinni 4 stjörnur af 5 mögulegum, Rolling Stone og Washington Post 3,5 af 4, en Boston Globe gefur henni hins vegar aðeins 2,5 af 5.