Leikarar þurfa að ganga í gegnum ýmislegt áður en þeir taka að sér ákveðin hlutverk
Leikarar þurfa oft á tíðum að ganga í gegnum ýmislegt áður en þeir taka að sér ákveðin hlutverk, hvort sem er á leiksviði eða á hvíta tjaldinu. Sumir þurfa að léttast talsvert á meðan aðrir þurfa að þyngjast, allt til þess að gera sögupersónurnar trúverðugar í augum áhorfenda.
Þakkargjörðarhátíðin vestanhafs stendur nú sem hæst og af því tilefni tók Mel Magazine saman skemmtilegan fróðleik um leikara sem þurftu að bæta á sig áður en þeir tóku að sér ákveðin hlutverk.
Hjartaknúsarinn George Clooney bætti á sig, að sögn, fimmtán kílóum áður en hann tók að sér hlutverk í myndinni Syriana sem kom í kvikmyndahús árið 2005. Clooney sagði um það leyti sem myndin var frumsýnd að það eina sem hann hafi gert hafi verið að hætta að stunda líkamsrækt auk þess sem hann borðaði ruslfæði í öll mál í nokkrar vikur. „Maður borðar bara þar til maður er við það að kasta upp,“ sagði hann.
Óskarsverðlaunahafinn Jared Leto þurfti að bæta verulega á sig áður en hann tók að sér hlutverk Marks Davids Chapman, morðingja Johns Lennon, í myndinni Chapter 27 sem kom út árið 2007. Eins og meðfylgjandi mynd sýnir er Leto nokkuð ólíkur sjálfum sér. En hvernig fór hann að því að þyngjast? Jú, hann gerði það að venju að setja rjómaís í örbylgjuofninn sem hann drakk svo með bestu lyst. Stundum bætti hann olíu út í.
Það virðist býsna góð ávísun á ótæpilega þyngdaraukningu að drekka rjómaís. Colin Farrell gerði það áður en tökur á myndinni The Lobster hófust. Myndin kom út á síðasta ári og sagði Farrell í viðtali ekki alls fyrir löngu að hann hefði sett Häagen-Dazs ís í örybylgjuofnin sem hann drakk síðan. Þess má geta að uppáhaldið hans var kaffiís. Svo borðaði hann ostborgara alla morgna í nokkrar vikur.
Ryan Gosling hugsar vel um heilsuna og er nánast alltaf í sínu besta formi í sínum myndum. Til stóð að Gosling myndi leika eitt af aðalhlutverkunum í myndinni The Lovely Bones í leikstjórn Peters Jackson árið 2009. Af því varð ekki vegna þess að Gosling og Jackson voru ósammála um hvernig persóna Gosling ætti að líta út. Gosling sagðist vera trúr þeirri sannfæringu sinni að aðalpersónan, Jack Salmon, ætti að vera að lágmarki 100 kíló en Jackson var því ósammála. Svo fór að Gosling bætti á sig um 30 kílóum áður en hann fékk sparkið. Að lokum fór það svo að Mark Wahlberg tók að sér hlutverkið sem Gosling átti að leika. Eftir sat Gosling með sárt ennið og talsvert mikið af aukakílóum.
Sly þurfti að bæta á sig um 20 kílóum áður en hann tók að sér hlutverk í myndinni Copland sem frumsýnd var árið 1997. Morgunverðarmatseðillinn, meðan á þessu stóð, var nokkurn veginn svona: Fimm pönnukökur með hnetusmjöri og rjóma, hafragrautur, tvær beyglur með hnetusmjöri, 10 steikt egg, franskar og ostakaka. Stallone var væntanlega ekki lengi að ná markmiði sínu.
