Erlendir fjölmiðlar tala um upprisu Mel Gibson eftir að ný kvikmynd hans, Hacksaw Ridge, var sýnd um síðustu helgi á kvikmyndahátíðinni í Feneyjum. Eftir sýningu myndarinnar risu áhorfendur úr sætum og klöppuðu leikstjóranum og mynd hans lof í lófa í heilar tíu mínútur.

Hacksaw Ridge er fyrsta kvikmynd Gibson í tíu ár. Þar er sögð sönn saga Desmonds Doss sem gegndi herþjónustu í seinni heimsstyrjöldinni en neitaði að bera vopn þar sem það samræmdist ekki lífsskoðunum hans. Hann var því vopnlaus á átakasvæðum og í fremstu víglínu. Seinna var Doss heiðraður fyrir að hafa bjargað lífi fjölmargra félaga sinna. Andrew Garfield fer með hlutverk Doss. Myndin hefur hlotið mikið lof þeirra sem hafa séð hana en hún verður frumsýnd í Bandaríkjunum í byrjun nóvember.

Í Hollywood hefur Gibson verið úti í kuldanum árum saman vegna slæmrar hegðunar en árið 2006 var hann handtekinn fyrir ölvunarakstur og heyrðist þá formæla gyðingum. Fleiri hneyksli fylgdu í kjölfarið sem sýndu að Gibson ætti erfitt með að stjórna skapi sínu og væri jafnvel ofbeldisfullur. En batnandi manni er best að lifa og Gibson sagði eftir sýningu myndar sinnar í Feneyjum að hann hefði meðvitað dregið sig í hlé í nokkur ár. Hann bætti við: „Ég held að besta aðferðin við að biðjast afsökunar sé að koma sjálfum sér í lag og það er það sem ég hef verið að gera.“

Gibson hlaut Óskarsverðlaun fyrir leikstjórn á Braveheart og talið er að Hacksaw Ridge eigi eftir að verða tilnefnd til virtustu kvikmyndaverðlauna og blanda sér í baráttuna um Óskarinn.