Barbra Streisand er orðin 74 ára en enn full af starfsorku. Hún sendi nýlega frá sér nýja breiðskífu, Encore, en þar syngja með henni frægir leikarar, þar á meðal Anne Hathaway, Melissa McCarthy, Jamie Foxx og Hugh Jackman. Streisand hefur verið á ferðalagi um Bandaríkin til að kynna breiðskífuna. Fljótlega hefjast síðan upptökur á nýrri kvikmynd með henni, Gypsy, sem er endurgerð myndar frá árinu 1962 um dansarann Gypsy Rose Lee. Streisand leikur þar móður Gypsy.

Streisand hefur verið gift leikaranum James Brolin í átján ár og segir að hjónabandshamingjan hafi gert sig lata. Leti er samt ekki orð sem hæfir leik- og söngkonunni. Hún hefur í rúmt ár unnið að gerð ævisögu sinnar og hefur eflaust frá mörgu merkilegu að segja. Æska hennar var ekki hamingjurík. Faðir hennar lést snögglega þegar hún var einungis fimmtán mánaða gömul og hún segist alltaf hafa saknað hans. Móðir hennar gagnrýndi hana stöðugt og faðmaði hana aldrei. Önnur börn stríddu henni vegna útlits hennar. Streisand þurfti því snemma að takast á við alls konar erfiðleika. Hún yfirvann þá og varð heimsfræg stjarna, ein þeirra fáu sem hreppt hefur Óskars-, Emmy-, Golden Globe-, Grammy- og Tony-verðlaunin.