Miranda Hart hefur haldið uppi fjörinu á RÚV á föstudagskvöldum í gamanþáttunum Miranda, en nú er komið að síðasta þætti í fyrstu þáttaröðinni. Þá er að biðla til dagskrárstjóra erlendrar dagskrár að kaupa næstu þáttaröð. Þættirnir geta varla verið svo dýrir að það sé ekki hægt. Miranda er skemmtun sem við megum ekki missa af. Það eru ár og dagar síðan jafn fyndinn þáttur hefur verið á dagskrá.

Það hefur ekki farið framhjá neinum að heimurinn er hættulegur staður og það svo mjög að stundum fyllist maður vonleysi og glatar trú á mannkynið. Þá er reyndar gott ráð að hlusta á Mozart sem getur læknað flest mein. En svo er líka gott að hlæja og Miranda fær mann til að hlæja upphátt og það margsinnis. Við þurfum á gleði að halda.

Endursýningar hafa verið afar áberandi á RÚV. Ekki skal kvartað óskaplega yfir því, en stundum finnst manni samt að það sé ekkert í sjónvarpinu nema eitthvað sem maður hefur séð áður. En þá hefur maður getað hugsað með sér: Miranda er á föstudaginn – og þannig vill maður geta hugsað áfram. Svona í framhjáhlaupi er rétt að fagna endursýningum á Fawlty Towers með snillingnum John Cleese – klassískir þættir sem alltaf er hægt að horfa á.

Leikkonan Miranda Hart er sannkallaður gleðigjafi og kemur alltaf á óvart með furðulegum viðbrögðum sínum. Galgopahúmorinn er beinlínis smitandi. Leikkonan er sjálf handritshöfundur þáttanna og hugmyndaflug hennar virðist óþrjótandi. Miranda Hart er líka öðruvísi, eins og hún gerir sér sjálf grein fyrir og nýtir sér í túlkun á persónu sem er klunnaleg og klaufaleg (nokkuð sem getur kallað á meinlegar athugasemdir illa innrætts fólks) en er um leið áhugaverð og sjarmerandi á sinn sérstaka hátt. Miranda sýnir okkur að það er í góðu lagi að vera öðruvísi en aðrir því þannig verður viðkomandi jafnvel áhugaverðasta manneskjan á mannamótum.

RÚV má ekki afneita Miröndu. Góði dagskrárstjóri, festu snarlega kaup á næstu þáttaröð og við munum hugsa hlýlega til þín!