Börn Donalds Trumps taka ríkan þátt í kosningabaráttu hans til forseta Bandaríkjanna og hið sama á við um Chelsea Clinton, einkadóttur Hillary Clinton, sem er áberandi í baráttu móður sinnar. Ivanka Trump, elsta dóttir Trumps, og Chelsea eru góðar vinkonur og hafa þekkst árum saman. „Hún er dásamleg manneska og mjög góður vinur minn,“ sagði Ivanka nýlega aðspurð um vináttu þeirra, sem hefur ekkert breyst þrátt fyrir hina hörðu kosningabaráttu.
Ivanka er 34 ára gömul, þriggja barna móðir, dóttir Trumps og fyrstu eiginkonu hans, Ivonu. Ivanka starfaði um tíma sem fyrirsæta, er hagfræðingur að mennt og vinnur hjá föður sínum en hún er mikill aðdáandi hans. Hún segir að faðir sinn sé femínisti sem hafi ráðið konur til æðstu starfa hjá Trump-veldinu. Hún gefur honum þá einkunn að hann sé afar hlýr maður með frábæra kímnigáfu og einstaklega góður faðir.
