Kvikmyndarisinn Disney liggur undir ámæli þessa dagana vegna nýrrar myndar sem ber heitið Moana. Er það einna helst útlit hetjunnar Maui sem gegnir veigamiklu hlutverki í goðafræði Pólýnesíu sem vakið hefur hörð viðbrögð.

Það er vöðvafjallið Dwayne Johnson, einnig þekktur undir nafninu The Rock, sem talar fyrir Maui í myndinni. Moana segir frá ævintýrum prinsessu einnar, Moana, sem leggur upp í langt ferðalag með fyrrnefndum Maui sem er nokkurskonar hálfguð, hálfur maður og hálfur guð.

Myndin verður frumsýnd í Bandaríkjunum næsta vetur en stiklur úr myndinni eru þegar farnar að birtast. Ekki eru allir sáttir við Disney og er það einna helst sú mynd sem dregin er upp af Maui sem fer fyrir brjóstið á fólki.

„Þegar við skoðum myndir af fólki, körlum og konum, frá Pýlýnesíu undanfarin hundrað ár eða svo sést að langflestir glíma ekki við offitu. Þessi neikvæða staðalímynd sem dregin er upp af Maui er óásættanleg – Nei takk, Disney,“ segir nýsjálenski þingmaðurinn Jenny Salesa sem á ættir að rekja til Tonga í Pólýnesíu. Bætti Jenny um betur og sagði að Maui liti út eins og blanda af svíni og flóðhesti.

Fleiri hafa látið sig málið varða og einn þeirra er Eliota Fuimanono Sapolu, atvinnumaður í rúgbý sem leikur fyrir landslið Samóa í Kyrrahafi. „Maui lítur út eins og hann hafi verið að veiða fisk. Það er eftir að hafa djúpsteikt hann og borðað hann allan,“ segir Eliota.

Samkvæmt pólýnesískri goðafræði er Maui guðinn sem bjó eyjarnar í Kyrrahafi til með því að draga þær upp úr sjónum.

Will Ilolahia, frá Pacific Island Media Association, sagði í samtali við Waatea News að þessi Disney-útgáfa af Maui ætti ekkert skylt við goðafræði Pólýnesíu. „Þessi lýsing á Maui, að hann sé of þungur, er dæmigerð af hálfu Bandaríkjamanna.“