RÚV stóð vaktina á miklum ólgudegi
Síðastliðinn þriðjudagur var mikill ólgudagur í íslenskri pólitík, eins og varla þarf að rifja upp. Ástæða er til að hrósa RÚV alveg sérstaklega en þar stóðu menn vaktina af mikilli staðfestu, hófu sjónvarpsútsendingar um hádegi og þær stóðu langt fram eftir degi. Við sáum Ólaf Ragnar Grímsson brillera svo í beinni útsendingu á fréttamannafundi að fjölmörgum finnst að þaðan megi hann ekki hverfa. Jafnvel þeir sem hafa haft ama af búsetu hans á Bessastöðum gátu ekki annað en viðurkennt að þarna er alvöru töffari á ferð. Öryggisventillinn virkaði, sagði þingmaður sem hefur þó áður vikið köldum orðum að forsetanum. Já, Ólafur Ragnar var flottur!
Í sjónvarpssal voru álitsgjafar og bar þar mest á Guðna Th. Jóhannessyni, doktor í sagnfræði, og Ragnhildi Helgadóttur lagaprófessor. Bæði voru þau frábær. Fyrirfram hefði ég átt erfitt með að ímynda mér að lagaprófessor gæti verið líflegur í sjónvarpsviðtali en ég veit greinilega lítið um lagaprófessora því Ragnhildur kom verulega á óvart. Hún hefur sterkan og sérstakan persónuleika, er málefnaleg og miðlar fróðleik á afar skemmtilegan hátt. Maður lagði sannarlega við hlustir. Svona kona á að vera í sjónvarpi.
Guðni Th. er náttúrlega mikið yndi, er afar fróður og óhræddur við að slá á létta strengi. RÚV virðist hafa fengið mikið dálæti á sagnfræðiprófessornum sem var einnig gestur þar kvöldið eftir og hafði ekkert látið á sjá. Ég gæti horft á Guðna á hverju kvöldi og er sannfærð um að fjölmargir eru á sama máli. Þarna voru tveir álitsgjafar sem höfðu mikið fram að færa, hafa sjónvarpssjarma og eru skemmtilegir. Við verðum að sjá meira af þeim.
