Ben Affleck afleitur í hlutverki sínu sem Batman, að mati Frosta
„Ég verð bara að segja alveg eins og er að ég gekk út af þessari mynd,“ segir Frosti Logason, útvarpsmaður á X-inu og þáttastjórnandi Harmageddon. Þeir Frosti og Máni skelltu sér í kvikmyndahús um helgina þar sem þeir sáu stórmyndina Batman vs. Superman: Dawn of Justice.
Óhætt er að segja að myndin hafi fengið misjafna dóma hjá kvikmyndagagnrýnendum og almenningi. Myndin er með einkunnina 7,4 á IMDB.com en aðeins 44/100 á vef Metacritic.
Myndin var til umfjöllunar í Harmageddon í dag, en Frosti sagðist hafa gengið út af myndinni í hléi, svo léleg var hún. „Ég var eiginlega genginn út áður en hléið skall á, en ég náði að tóra fram að hléi,“ sagði Frosti sem sagði að Ben Affleck, sem fer með hlutverk Batman í myndinni, valdi ekki hlutverkinu.
„Ben Affleck er handónýtur Batman. Mér finnst hann gjörsamlega óþolandi. Hann er líka leiðinlegur leikari yfir höfuð. Hann er ekki að valda þessu að mínu mati,“ sagði Frosti og bætti við að myndinni takist ekki að útskýra nógu vel hvers vegna grunnt sé á því góða á milli Batman og Superman. „Maður kaupir ekki alveg af hverju þeir eru óvnir,“ sagði Frosti.
Máni gaf myndinni jákvæðari umfjöllun en Frosti og sagði að Ben Affleck væri ágætur í hluverki sínu. „Mér fannst Ben Affleck vera fínn Batman. Það sem var að þessari mynd var Superman sem er glötuð ofurhetja. Hann er bara leiðinlegur,“ sagði Máni og bætti við að Frosti hefði misst af tilfinningakláminu sem gerði vart við sig eftir hlé. Myndin hefði þó skánað töluvert eftir hlé.
Samræður Frosta og Mána um myndina má heyra í spilaranum hér að neðan.
