Ófærð fær hörkudóma í breska blaðinu The Guardian en lokaþátturinn var sýndur á BBC í gærkvöldi.

Gagnrýnandinn Ellie Violet Bramley, skrifar um þáttaröðina og segir um tvo síðustu þættina að þeir hafi verið ekkert minna en stórkostlegir.

Þannig hafi flétta sögunnar verið kröftug og að þó þættirnir hafi ekki verið yfirkeyrðir af spennu, þá hafi uppgjörið verið meira heillandi fyrir vikið.

Þá tóku Bretarnir einnig eftir því að Ólafur Darri renndi aldrei upp úlpunni, sama hversu vont veðrið var. Það hafi þó loksins gerst í lokaþættinum, þar sem hann festist inn í frystigeymslunni; nokkuð sem allir höfðu beðið eftir, að sögn gagnrýnandans.

Gagnrýnina má lesa hér, en við þetta má bæta að Ólafur Darri hefur hlotið mikla athygli fyrir leik sinn sem og Ilmur Stefánsdóttir, sem er senuþjófur að mati margra.