Nýr landsliðsbúningur íslenska landsliðsins var kynntur á fimmtudag. Almenn ánægja virðist vera með búninginn þótt skoðanir séu skiptar eins og alltaf. DV spurði þrjá tískufróða einstaklinga um álit þeirra á nýja landsliðsbúningnum.

Ellen Loftsdóttir Fannst fyrri búningurinn eitt það ljótasta sem hún hefur séð í þessum málum

„Ég hef nú aldrei verið aðdáandi landsliðstreyjunnar og er engin breyting þar á eftir að hafa séð þessa nýju,“ segir Ellen Loftsdóttir stílisti. Ellen segir að treyjan sé þó nokkru skárri en síðasta treyja „sem var eitt það ljótasta sem ég hef séð í þessum málum,“ segir Ellen og bætir við:

„Maður hálf vorkenndi þessum sætu strákum að þurfa að spila á stórmóti í þessu, enda er Errea merki sem sérhæfir sig í hönnun á markmannshönskum. Er frændi eigandans að vinna hjá KSÍ? Veit ekki um neitt landslið í heiminum sem klæðist þessu merki.“

Bóas Kristjánsson Fatahönnuðinum finnst búningurinn líta úr fyrir að vera ódýr og mislukkaður

Bóas Kristjánsson fatahönnuður segir að um sé að ræða einfaldan búning sem sé í raun bara gott mál.

„Íslenski búningurinn fær „pixla gradient“ bláan, rauðan og hvítan á ermarnar sem mér finnst frekar dúllulegt en er ekki viss um að líti vel út í fjarlægð. Kraginn nær ekki alla leið í hálsmálinu sem hönnuðurinn hefur leikið sér aðeins með. Búningurinn er of flatur fyrir minn smekk. Það sem er mjög skemmtilegt er að inni í bolnum skuli standa „Fyrir Ísland.“ Ég hef trú að því að strákarnir fái auka hvatningu við að sjá búningana hangandi í klefanum með þessari áletrun. Ef ég á að vera 100% hreinskilinn, og mér finnst leiðinlegt að segja það, en hann er að mínu mati nokkuð ódýr og mislukkaður.“

Eygló Margrét Lárusdóttir Var upp í rúmi að borða beikonbugður þegar DV náði tali af henni

Mynd: © 365 ehf / Hanna Andrésdóttir

Eygló Margrét Lárusdóttir fatahönnuður var stuttorð í samtali við DV. „Mér finnst öll íþróttaföt ljót. Ég sé að það er svona frussandi eldfjall á ermunum. En hvað get ég sagt, ég er bara aumingi uppi í rúmi að éta beikonbugður.“