Nýlega voru list- og kirkjugripir vígðir í Sólheimskirkju í Grímsnesi, en bikarar og patínur voru unnar af heimilisfólkinu á Sólheimum undir handleiðslu Ingibjargar Karlsdóttur listakonu og kennara á Sólheimum. Það var Kristján Valur Ingólfsson vígslubiskup sem vígði gripina og séra Sveinn Alfreðsson prestur á Sólheimum aðstoðaði við vígsluna.
Birgir Þórarinsson þingmaður og Sveinn Hjörtur Guðfinnsson, fyrrverandi formaður Framsóknarfélags Reykjavíkur brugðu sér í vígsluathöfnina.
„Eftir messukaffið fengum við einstaka kynningu á sögu, starfi, og hugsjón þeirri sem knýr samfélagið á Sólheimum,“ segir Sveinn Hjörtur. „Reynir Pétur sagði okkur söguna og sýndi okkur meðal annars gamla húsið en það er afar merkilegt og var virkilega gaman að heyra frá minningum Reynis, en hann kom aðeins þriggja ára til Sólheima.“
Kvöldinu lauk með söng og spilaði Reynir Pétur á munnhörpuna fyrir gesti.
„Ég þakka fyrir hjartahlýjar móttökur og sé í hvert sinn sem ég kem í heimsókn til Sólheima í Grímsnesi hvar hrein og tær lind kærleikans og mannvirðingar er að finna. Það er ekki að ástæðulausu að maður sækist í þá miklu lind, þar er hreinleikinn, kærleikurinn, og virðingu að finna,“ segir Sveinn Hjörtur.
