Líkt og RÚV greindi frá í gær þá hafði leikstjóri Skaupsins ekkert um þau atriði að segja þar sem gert var grín af Bjarna Benediktssyni, formanni Sjálfstæðisflokksins og fjármálaráðherra. Ástæða þessa var sögð að leikstjórinn, Arnór Pálmi Arnarson, hafi átt í sambandi við dóttur Bjarna, Margréti Bjarnadóttur. Hið rétta er að samband þeirra mun hafa verið óformlegt og er nú lokið.

Þrátt fyrir þetta þurfti að ganga úr skugga að tengsl Arnórs myndu ekki hafa áhrif á efnistök Skaupsins. „Við ákváðum á fyrsta degi að í hvert skipti sem við myndum ræða um Bjarna Benediktsson þá hefði Arnór ekki atkvæðisrétt. Það var núll vandamál með það,“ sagði Dóra Jóhannsdóttir, yfirhandritshöfundur Skaupsins, í viðtali við RÚV.

Flest allir fjölmiðlar greindu frá sambandi Arnórs og Margrétar í kjölfar fréttar RÚV en hvergi var minnst á að þau væru ekki lengur að hittast. Fjölmiðlamaðurinn Gunnar Smári Egilsson gagnrýndi fyrr í dag val RÚV á leikstjóra og sagði það í hæsta máta óeðlilegt að honum hafi verið falið það verkefni.

„Bíddu, fyrst setur sýslumaður Sjálfstæðisflokksins lögbann á umfjöllun óháðra aðila um spillingu Bjarna Ben og svo felur Ríkisútvarpið vonbiðli dóttur Bjarna að leikstýra áramótaskaupinu. Ekki að undra að hægri drengir eins og Gísli Marteinn og Logi Bergmann séu að pissa í sig af hlátri. Samkvæmt skaupinu sprakk ríkisstjórn Bjarna ekki vegna varðstöðu hans með vini bjarnaníðings, sem vill svo til að er faðir Bjarna, gegn skýrum kröfum þolanda níðingsins, heldur út af unglingslegum dillum í krökkunum í Bjartri framtíð. Sem er einmitt sú söguskoðun sem Bjarni hefur haldið á lofti,“ segir Gunnar Smári á Facebook.