Áhugaverð heimildarmynd fjallar um morðið á rapparanum vinsæla
Rannsóknarlögreglumennirnir Tim Brennan og Robert Ladd, sem komu að rannsókn á morðinu á rapparanum Tupac á sínum tíma, telja sig vita fyrir víst hver framdi morðið. Tupac var skotinn til bana í Las Vegas þann 7. september árið 1996, 25 ára að aldri.
Í nýrri heimildarmynd um morðið, Who Shot Biggie & Tupac, segja Brennan og Ladd að Orlando Anderson, meðlimur í glæpagenginu South Side Crips, hafi tekið í gikkinn þennan örlagaríka dag. Orlando hefur áður verið bendlaður við morðið en aldrei kom til þess að hann yrði ákærður. Anderson var sjálfur skotinn til bana í Compton í Los Angeles árið 1998.
„Við teljum að Orlando Anderson hafi framið morðið,“ segir Ladd meðal annars í myndinni. Ladd og Brennan voru rannsóknarlögreglumenn hjá lögreglunni í Compton og hafði Anderson verið til rannsóknar í öðru morðmáli hjá rannsóknardeild lögreglunnar. Voru þeir fengnir til að leggja lögreglunni í Las Vegas lið við rannsókn málsins.
Í heimildarmyndinni er því varpað fram að Anderson hafi skotið Tupac til bana eftir að félagar Tupacs réðust á hann og börðu. Lögregla taldi sig hafa áreiðanlegar heimildir fyrir því að Anderson hefði gortað sig af morðinu í lokuðum hópi manna eftir að það var framið.
Ástæða þess að Brennan og Ladd telja fullvíst að Anderson hafi staðið á bak við morðið á Tupac er meðal annars sú staðreynd að nokkrum árum síðar fannst skotvopnið sem notað var við morðið. Byssan, 40 kalíbera Glock-skammbyssa, fannst í húsi hjá kærustu eins af meðlimum South Side Crips. Rannsókn lögreglu leiddi í ljós að kærasti konunnar var í Las Vegas þegar morðið var framið. Rannsókn á skotvopninu leiddi í ljós að um var að ræða sömu byssu og notuð var við morðið á Tupac.
Þá kemur fram í heimildarmyndinni að Brennan hafi rætt við besta við Anderson og sá hafi viðurkennt að Anderson hefði framið morðið.
Því hefur stundum verið haldið fram að Suge Knight, fyrrverandi stjórnarformaður Death Row Records, hafi staðið á bak við morðið en Suge var með Tupac kvöldið örlagaríka. Þeirri kenningu er kastað fyrir róða í myndinni og bent á að tilviljun ein hafi ráðið því að Suge var ekki sjálfur skotinn þegar byssumaðurinn hóf skothríðina. Í myndinni er einnig rætt við Knight og í henni varpar hann fram að minnsta kosti einni sprengju. Hann kveðst ekki útiloka að Tupac sé á lífi.
„Þegar ég yfirgaf sjúkrahúsið vorum við Pac hlæjandi,“ segir hann meðal annars. Þegar hann var spurður hvort hann tryði því að Tupac væri á lífi, segir hann: „Þegar Tupac er annars vegar er aldrei að vita.“
