Katie Holmes og Jamie Foxx hafa loks opinberað samband sitt en þau hafa síðustu fimm ár farið afar leynt með það og forðast að láta sjá sig saman opinberlega. Sú saga gengur fjöllum hærra að þegar Holmes skildi við eiginmann sinn, Tom Cruise, hafi hann sett þá klausu í skilnaðarsáttmála þeirra að hún mætti ekki fara á opinbert stefnumót í fimm ár. Í staðinn fékk hún háa peningagreiðslu frá Cruise. Bandarískir lögfræðingar hafa tjáð sig um málið og segja slíkt skilyrði fordæmalaust. Þessi fimm ár eru nú liðin og Holmes og Foxx leyna ekki lengur ástarsambandi sínu. Hvorki Holmes né Cruise hafa rætt skilnaðarsáttmála sinn.
Tom Cruise þykir vera æði stjórnsamur. Við tökur á mörgum myndum sínum hefur hann hagað sér eins og yfirmaður, skipað kvikmyndatökumönnum fyrir og snúið við ákvörðunum leikstjóra. Hann er einnig ráðríkur þegar kemur að samskiptum við blaðamenn. Ástralskur blaðamaður segist hafa orðið að fara á fjögurra tíma námskeið um starfsemi Vísindakirkjunnar áður en honum var leyft að taka viðtal við leikarann.
