Breska leikkonan Helen Mirren er sjötíu og eins árs og því lífsreynd kona. Hún hélt nýlega ræðu í Tulane-háskólanum í New Orleans og gaf nemendum ráð. Hún ráðlagði þeim að hafa fimm reglur í heiðri og þá myndi þeim vel farnast.

Fyrsta reglan sem á að tryggja hamingjuríkt líf er að þjóta ekki í hjónaband og rugla alls ekki saman kynlífi og ást. Leikkonan gekk seint í hjónaband og er alsæl með mann sinn, bandaríska leikstjórann Taylor Hackford. Hún segir mikilvægt að styðja makann og gefa honum frelsi til að láta drauma sína rætast. Mirren og Hackford fagna tuttugu ára brúðkaupsafmæli í ár.

Regla númer tvö er að koma eins fram við alla, allir eigi rétt á að komið sé fram við þá af virðingu. Þriðja reglan er að láta sér á sama standa um þá sem dæma mann eftir útliti, sérstaklega ef viðkomandi er nafnleysingi á netinu. Fjórða reglan sem Helen Mirren nefndi er að óttast ekki óttann. „Kastið frá ykkur varkárni. Horfið í andstyggilegt andlit óttans og ryðjist áfram. Og þegar þið skjótist fram úr óttanum snúið ykkur við og sparkið í rassinn á honum,“ sagði Mirren. Fimmta og síðasta regla leikkonunnar er að forðast að flækja hlutina um of.